Namati na sa saod an efecto nin dagdag-presyo sa produktong petrolyo.
Nagdoble na daa an presyo nin magcapirang mga gulay na imported haring Baguio City o Benguet.
An carneng orig na laman tres cientos veinte na an kilo, nagdagdag nin veinte pesos cada kilo.
Magpoon kan shear line pati an paghangin-hangin na dara nin amihan, dae na nagbaba an presyo nin sila.
An barato na sana duwar na ciento sisenta an kilo, masunod an tilapia na ciento otsenta an kilo.
Kung masilam-silam na sila, maabot na nin dos cientos otsenta sagcod tres cientos cincuenta an kilo.
Makanagbo ka man nin malasugui, daog pa an pasyente sa Quezon Institute sa sobrang niwang pero an presyo mataba: cuatro cientos an kilo.
Caya ngani urit-urit nang paguiromdom kan DA, magtaranom na an cada familia sa saendang solar o caya sa lata o baldeng huwa, tanganing igua lamang na hahalaton na anihon pakapilang semana.
Harimbawang dae pang bunga, magtipid na muna sa panghalong gulay, bangaon sana an dating pamadpad.
Dae na ngona magparamamam nin nakaboyong, ta an kaiba kaan pulutan, mangaipo na naman nin carne y panghalong gulay.
Kaniling man matapos an giyera sa Middle East y magbaba an presyo nin produktong petrolyo, puro na kamo maniwang y bako nang alta presyon, he! he! he!
*****
An negocio ngonian na baguing boom na boom iyo an laundry business.
Dakul na an nagbotwang mga negosyanteng paralaba, igua na nganing ogbon an saro diyan sa sentro nin Virac.
Ciertong gakita an mga ini, lalo na sa panahon ngonian na deficil nang makahanap nin katabang sa harong, masqui pa ngani paralabang semanal.
Kung makakua ka man nin paralaba, hababa na an quinientos an aldaw, baad maghagad pa nin dagdag sa pagplantsa.
Sa laundry na kumpleto nin washing asin drying machine, an quinientos mo puede na sa lampas diyes kilos labada, puede mo pang makua pagkahapon.
An delicado sana caini, kung mahubas na an bahaw na pigakuahan nin tubig nin Viwad lalo na ta summer na sa Abril.
Caya kung mangyari ini, dae matapos an Cuaresma ta padagos an pagpamibi nin dagdag na uran…
*****
Mabenta na naman ngonian an bisikleta.
Ini an tunay na alternatibong sakayan sa panahon nin krisis sa gasolina y krudo.
Barato sana, igua kang pirang ribo, puede ka na magpidal paribod.
Dae pa kaipuhan idara sa Powerzone o Silangan.
Dae man isaksak sa Corriente arog kan mga e-bike na kung minsan naubusan na nin karga y caipuhan nang guyodon nin traysikel.
Magayon pang ehersisyo sa ginhawa.
Ang importante, dae sana pagkabitan nin sidecar ta kung sakayan an nin durodaculang ginhawa, dae na kamo makaasba sa tukadon.
*****
Inaabisuhan an mga gaplano pang magbakasyon sa Isla Maogma ngonian na summer: sa masunod na taon na lamang.
An pamasahe sa bus naglangkaw na y kung gusto mo ngani nin komportableng Skybus, dos mil cien na an cada tocawan.
Kung madara ka man nin sasakyan, amot na an mabawas sa saimong pitaka sa gasolina o krudo pa sana, dae pa kabali an halos cuatro mil na pamasahe kan sasakyan sa ferry boat.
Pag-abot sa Isla Maogma, magastos ka na naman nin dae mababa sa siete mil pesos kung ma-360 o ma-Visita Iglesia.
An suhestiyon ngani daa nin simbahan na Catolico, limitaran an Visita Iglesia diyan mismo sa simbahan o capilya kan barangay tanganing libredo sa gastos.
Dae man daa nasukol an pagkabanal sa padarakulan nin napuntahan na simbahan sa Semana Santa o caya kung naubos mong lakawon an mga prusisyon.