Nag-aparecer si Gob Azanza sa sesyon kan SP kan Lunes segun sa napaghoronan kan cada lado na tocaron na an 2026 budget kan gobyerno provincial.
Kung bago pa ini, binawi na ngona kan mga bocal an resolusyon na nagdeclarar qui gobernador bilang persona non grata, dae ko isi.
Dae daang ibang iskedyul na paghoronan kundi an awat nang atrasadong budget kan capitolyo.
Ngonian ka, bago pa man nagbukas an sesyon kan hapon na Lunes, enot na daang nagharampangan an duwang lado duman sa legislative building.
Bantay sarado daa nin pulis an edificio tangani sigurong daeng makalaog na mangrarawraw pati mga sawong-sawong.
Kung ano an pinaghoronan, daeng anuncio an oficina ni Azanza, si Bise Gob Obet asin pag-iriba.
Alagad, an mga pilyong observador kan mga nangyayari sa capitolyo isi na daa kung ano an pinaghoronan: an barangaan na nakapabanga sa cada lado magpoon pa kan isumitir an budget, he! he! he!
Maghapot na sana tabi sa mga ini o sisay man politico, may sungay man o dae, tahodan man o aqui, tanganing maipariwanag.
Kung harimbawang maaprobaran na an budget sa masunod na sesyon, uha, alam na, nagkaoroyon na sa pagbaranga, he! he! he!
*****
An mga mabali sa People Power Trillion Peso March ngonian na Miercoles na hapon mabitbit daa nin mga karatulang mapahayag nin sentimiento kan publico kontra sa korapsyon.
Sigurohon tabi na an mensahe sa darang tarpolin iyo man an saimong pagtubod sa buhay.
Baad iguang makisawsaw na presente o dating politico na an darang tarpolin kontra sa korapsyon, tibaad iguang magkomentaryo nin kalaen, makulog sana an boot caini.
Sa mga ordinaryong votante man na malakaw sa martsang ini, magayon na ipahayag na an saendang desisyon na dae na mag-ako nin bayad sa voto sa masunod na mga eleksyon, magpoon sa barangay and SK elections sa Deciembre pati na sa 2028 national and local elections.
Sa pagpili nin mga matocaw sa puesto nin poder gapoon an anuman na katrankilohan o karibokan sa gobyerno.
Sa pagpabakal nin voto, ciertong an itinaong cuarta babawion kan ganador na namakal sobrang doble pa, baad triple pa depende kung saen siya nakatocaw.
Caya ngani an panggana nin namakal nin voto, an bitbit hari sa tawo lisensya para magdaya nin proyecto, magsimit sa mga transaksyon y manghagad nin komisyon sa minsideisipga contratista.
Kung sa martsang ini magpoon an pagbabag-o sa ugali nin mga votante, marinas an magiging dalagan kan Isla Maogma.
*****
Pakatapos siguro kan horonot-honotan sa budget, magayon na magpasar an mga honorableng bocal nin resolusyon na mahagad nin imbestigasyon sa mga atrasadong proyecto nin DPWH sa Isla Maogma.
An mga proyectong ini na anas pigatrabaho nin mga taga-ibong, kung bakong delayed na golpi, puro pa mga substandard an pakagibo lalo na sa sukol nin bakal, halo nin semento, y bakong toltol na palaman sa mga dike.
Enoton an pagpahaman kan boulevard diyan sa San Vicente kabali na an tulay na dati nang nagbaratak an biga, pati na an P262 million na repair kan tinampo sa highway diyan sa Virac y manlaenlaen na banwaan.
Halos saro man sana an contratista caini na pinili kan Batalay House of Representatives ta dacula an contribusyon sa pagtabag, ay sala, pagtabang kan congresista sa mga nangangaipong mga constituentes.
An maimbestigar dapat hati sa DPWH Central Office, ibahan pa nin NBI pati iguang representasyon sa mga local na ingeniero, lalo na an Provincial Project Monitoring Committee.
Helingon ta daw kung iguang mangyari o caya tubuan kita nin muta sa kahahalat nin aksyon…isip