Igua na palan nin nagtubod na mga capitan sa orden kan DILG laban sa mga markang hinubon nin mga epal na politico.
Diyan sa San Roque sa Virac, pininturahan na an tatak sa barangay waiting shed na iguang inisyal nin soboot nagpaguibo.
Inda sa ibang barangay na iguang mga edificio na ginibo nin congtractor ba iguang tatak na “Catandunganon Alisto” o “Catanduanes Serbihan” kung mahalat pang kasuhan nin mga kagawad o sisay man na gainteres na magcandidato sa masunod na eleksyon nin barangay sa Deciembre.
Dae man puedeng nigaran ini kan mga nanunungdan ta sabi kan DPWH, na-turnover na daa sa saenda an mga edificiong ini.
Kung sabagay, puede na isabay sa pagtipon nin pambakal nin voto an cuartang ipambayad sa abogado, he! he! he!
*****
Sitenta y tres por ciento palan kan mga namundag na omboy kan 2025 anas mga aqui sa luwas o produkto nin mga magurang na bakong kasal.
Sayang na dae kabali sa survey kan PSA an hapot kung ngata dae pa kasal an mga magurang.
Cotana maisihan ta kung pilang bados an dinulagan kan katrato o caya kung anong rason – daeng panggastos, nasa abroad an ama, o habo an magurang – ngata dae nakakasal sa huwes man o sa simbahan.
Dae man naheling sa survey kung anong bulan an pinakadakul na minundag na omboy, tanganing maisihan ta kung noarin nag-ilaid an mga magsing-irog.
Kung harimbawang golpi an sultadang nangyari kan Valentine’s Day, dapat sa Noviembre luto na an tinapay y puede nang haonon, he! he! he!
*****
Duman na palan sa pier nin Pananaogan sa Bato nagdiskarga nin krudo y gasolina an barko nin Silangan Trading.
Mayad ini ta nakakua nin pansamantalang diskargahan an companya habang dae pang sadiling depot asin pier.
Segun sa reglamento, bawal na an magdiskarga nin krudo o gasolina sa mga pier na para sa cargo and passenger ships.
Sarong decada na an itinaong panahon para sa sisay man na tawo o establisimiento na gapabakal nin krudo o gasolina para magbogtak nin sadiring depot.
Dae man sigurong kinahang na penalidad an PPA, DOE o PCG sa mga ini kung dae nagsunod, alagad marinas na mag-atas-atas na sa pagpatrabaho nin depot.
*****
Nagbag-o na palan an pandok kan satong gatocaw na congresista.
Igua nang barbas si Cong Yoloyo kan ini magsumitir nin kopya kan saiyang proponidong resolusyon sa pag-establisir nin oficina nin MARINA sa Isla Maogma.
Sabi kan sihongan na barbero, sala daa an napahidan nin Minoxidil.
Cotana daa duman sa parte nin payo na ngonian disyerto na ta dae nang gatubo maski gabon, he! he! he!
Bako man ini sa pagdaog-daog sa mga kulang na an buhok, sabi niya, kundi ebidensya man daa an halakbang na angog na alisto sa romansa an lalaki, lalo na sa burosuhan, he! he! he!
*****
Sa otro semana, fecha 25, gigibohon an People Power Trillion Peso March: Pagkasararo Kontra Korapsyon na pinangengenotan kan Diocesis nin Virac.
Inaapodan an mga parabayad nin buwis na bako man politico, contratista o supplier na maki-ayon sa martsa laban sa mga buwaya sa gobyerno y an saendang mga kakomplot sa negocio.
An mga votanteng nagsulsol kan saendang pag-ako nin cuarta kan nacaaguing eleksyon puede man mag-atendir.
Cotana, magpatago na ngona an mga nacatocaw na politico, mga dating politico y sisay pang isi na nin tawo kung nadukitan nin maating politica.
Mabawasan an integridad kan martsa nin Simbahan kung iguang maheling na saginerong mga tawo sa protesta kontra korapsyon.