Daog palan sa pa-derby nin Dificelco an manok nin Capitolyo.
Nagpago man daa an mga gakapot na parabulang caya lang kulang nin diit an pakol kan maldos nin Lictin.
Nagkaliribok daa sa mga presinto y igua pa ngani daang nakuang bidyo y litrato kan taraohan nin cuartang nakaikim sa polyetos kan campo kan nacatocaw na director.
Igua man nin osipon na mas dakula an panao kan kalaban caini, nadaog lang ta inibahan nin mga loyalistang Sa Dati Sana.
Gana man giraray an presenteng director na si Alicia Arcilla na nakabakal, ay sala, nakakua nin suma total na siete cientos veinte cuatrong (724) voto mantang an kalaban na si Nick Gio Guerrero nakasambot man nin quinientos noventa y cinco (595) votos, o iguang kalamangan na ciento veinte nueve (109).
Sagcod sa ngonian, dae pang bareta kung igua nang pigsang-at na reclamo an derotado sa District Election Committee nin Dificelco.
An pagcaisi kan iba, pina-blotter na daa an mga insidente sa pulis diyan sa Calolbon. Halaton ta na sana kung ano talaga an istorya.
Sa ngonian, kung kikilatison an mga kolor kan mga nangganang mga pamburang, iguang saro si Cong Bong kan TGP duman sa Baras-Gigmoto, saro man si Cong Yoloyo kan Batalay House of Representatives diyan sa Bato, saro man si dating Gob Boboy sa Calolbon, y saro man an Capitolyo ni Gob Pata diyan sa Payo.
Dae na ngona pagbilangon an mga natada pang mga direktor ta nawaran ning tunay na amo, nasa Sweden, he! he! he!
*****
Sa nangyaring ini sa duwang eleksyon sa Dificelco, baguing balik na sa dati ang naturalesa kan eleksyon sa Isla Maogma.
Duman sa kahadean ni Cong Yoloyo, ciento cincuenta daa an taraohan caya nanggana an manok caini, daog sa pusta an kalaban na dating consejal.
Sa Calolbon, cincuenta, sanggatos y ciento cincuenta man an cada voto, tuwad an kalaban kan incumbent na direktor.
Caya sa pagluwas kan iskedyul kan mga aktibidades sa barangay y SK elections sa Deciembre, magtipon-tipon na nin sinsilyo.
Dae na puede an platang a-veinte, caya an hanapon maning y manang ta magian, puedeng tipigon nin saraday, he! he! he!
Magbakal na nin orig-orig na plastic diyan sa Taiwanese o sa saod, hulugan padiit-diit nin cuartang papel.
Igua ka pang halos tres cientos na aldaw bago mag-abot an Dec. 1, caya kung manincuenta cada aldaw, igua kang poco mas o menos quince mil.
Tres cientos man an na votante, lalo na kung an tatawan mo sana su mga gaduwaduwa.
Dagdagan pa nin pangabrasa y pakiinom, gana na, he! he! he!
*****
Igua na palan nin dinarakop an pulis na mga ilegalista sa sugal.
Alagad dae man daa ini nakasuhan ta mga tawo palan nin poderoso sa Capitolyo.
Ini an huringhuding nin mga nacaisi kan tunay na nangyayari sa campanya kontra sa ilegal na pasugal.
Dae man nin osipon si PD Cereno manongod sa lotteng o two-balls.
Igua na nganing mga reclamo na an nadakop sana kan mga pulis iyo itong mga ordinaryong tawo na gapalipas nin oras sa sadiri nindang harong.
Helingon ta daw kung makadasdas an PNP…
*****
Nadagdagan yata an congresista sa Isla Maogma.
Afuera sa tolong dati nang nakatindog o nakatukaw, an gobernador naghagad man nin parte sa mga proyecto kan DPWH.
Tercio daa dapat an barangaan sa deligencias posibles: 1/3 ki Gob Pata, 1/3 ki Cong Bong y 1/3 ki Cong Yoloyo.
An 1/3 tinao daa nin sarong undersecretary sa DPWH, he! he! he!
Daog na palan si Cong Yoloyo sa haranapan nin fondo, he! he! he! Gapraktis na siguro kung dae makagraduar an taga-Batalay sa 2028, he! he! he