Dae man siyempre nag-aser an padagos na patanos sa municipio nin Bato kan mangyari an campanya y pirilian nin bag-ong director sa junta directiba nin Dificelco katukal kan ginurangan na sa puestong si Boy Vargas.
Apat cotana an candidato – an tawo ni Cong Yoloyo na si Ambing Lee, an dating consejal na si Bong Vergara, an dating capitan kan Tamburan na si Ton Soria y an kagsadiri nin gasolinahan y dating amo sa BFP na si Nelson Marino.
Alagad, nadisqualify si Marino sa dahelan na naputulan nin corriente an boarding house caini sa Calatagan kan Noviembre ta dae nagbayad an mga nakiestar.
Sa tolong natada, si Soria sana an toltol ta dae nanartag nin pambubod sa mga votante.
An duwang mga nagakdan nin politico parehong daang nagsabwag nin paomok, ciento cincuenta daa qui Ambing y seguro pareho man qui Bong, caya an resulta apat sana an lamang kan maldos nin congtractor, he! he! he!
Caya kung sabihon tang an nakaluwas sa Baras-Gigmoto tawo ni Cong Bong ta daeng naglaban, tigsad naman si Gob Pata y Cong Yoloyo. An representante nin Viga-Payo-Bagamanoc sa BOD iyo si atorni Raul Angeles, an soboot loyalista kan gobernador.
An magayon na sultada sa Calolbon sa Sabado ta duwa sana an malaban sa rueda.
An dating nag-interes na si Allan Navales nag-atras na daa ta na-promote to agom sa DepEd.
Caya an natada iyo an presenteng director na si dating capitan nin Cabungahan na si Alice Arcilla, na soboot loyalista man nin mga Cua.
Kan ultimong aldaw para magsumitir nin Certificate of Candidacy, nag-aparecer si Nick Guerrero, taga-Lictin na soboot pinili ni Andro Facundo y suportado ni alcalde Aly Romano asin Gob Pata.
Igua pang tolong aldaw bago an sultada, purusta na kamo!!!
*****
Magpoon palan ngonian caipuhan nang gamiton nin mga taga-BFP an body-worn camera sa mga fire safety inspection sa mga establisimiento de negocio.
Dapat daa ga-record na an camera paghari kan bumbero sa fire station hanggan matapos an inspection y makabalik sa istasyon.
An dae paggamit kan camera, pagtunong caini o caya pag-tamper sa video posibleng magresulta sa kasong misconduct, sabi kan DILG.
Magayon na ideya ini, lalo na para sa mga selosong esposo o esposa, he! he! he!
Barato man sana an body-worn camera, mil-quinientos man sana sa online.
Magbakal nin saro, ipakurintas sa agom na magatol an dara-dara magpoon maghari sa harong, sagcod sa oficina o trabaho, hanggan sa pagparibod, he! he! he!
An mga negociante man, puede ini gamiton kung makihoron sa mga inspector nin municipio, bumbero, pulis o kolektor nin buwis.
Tanganing disimulado, puede man an bakalon antiparang iguang video camera, mil-tres cada saro hari sa China.
Kung makanagbo nin holdaper na taga-gobyerno, ciertong maluwas sa social media, he! he! he!
*****
Magpasensya an mga ciudadano kung masakit an marinas na sila sa saod o talipapa sa ngonian.
Iyo ini an panahon nin shear line, amihan, easterlies o kung minsan bagyo pa ngani.
Duwa nang parasira an nabutod sa lawod sa kagustuhan na makadali sana nin duwal, bakong malasugi o lapu-lapu, na puedeng panira nin pamilya.
Cuatro cientos an kilo nin lapu-lapu sa saod, kung igua kang maheling, y an banculis ngani tres cientos cincuenta an kilo.
Igua ka man nin macuang toros alagad tibaad dos cientos na an atado, igua pang bato sa irarom kan dahon.
Caya magpasensya ngona sa badi, tinapa, sardinas, o kung iguang repridyeretor, asin tilapia.
Kung habo mo, ika an magtios nin ripot sa pamana o pamanwit.