Dae pa ngani na-bidding an proyectong bag-ong edificio sa EBMC, igua na daang gana.
Ini an huringhuding sa mga local na contratista kan nacaaguing semana matapos gibohon an pre-bid conference sa capitolyo.
Segun sa contratistang ciertong dae magana, tinangro na daa nin sarong halangkaw na opisyal nin sarong municipio an proyecto sa contratistang duwang clase an dugo, he! he! he!
Noventa y nueve milyones an halaga kan proyecto,na masundan pa daa nin duwa pang proyecto na cien milyones buda dos cientos milyones, suma total cuatro cientos milyones.
Kung an paon sinubad, dae ta pa isi. Maghiling na sana tabi sa FB ta live man an pa-bidding sa fecha 26 nin bulan na ini.
Kung igua man nin horonhoron sa barangaan o deligencias posibles, iluwas sana an kan mga chismoso sa capitolyo pati kan mga dae naoringan sa dapog, he! he! he!
*****
Sa duwang naelegir na director sa Dificelco, an sarod aa an magiging representante nin capitolyo, pero sikreto sana, he! he! he!
Dae pa ngani daa ga-eleksyon, awat nang gapadara sa bag-ong hade nin impormasyon manongod sa hiwas-hiwas kan mga director na nag-gurang na sa Marinawa.
Sa katapusan kan Enero, maisihan na kung pirang matanos an naelegir sa BOD asin pira man an natadang mga tahodan o caya kapot man sa riog nin mga politico.
*****
Sarong veteranong parasurat an nag-post nin comentaryo manongod sa iriwal sa capitolyo.
Magayon daa an sinurat, lalo na ta pinalamanan nin mga pananaramon sa lengguaheng Latin y Espanyol.
Hinapot ta an sarong goslab nang paramasid sa gawe-gawe sa Islang Maogma kung ano an gustong sabihon kan mga dae nasabotan na tataramon.
Sala daa an persona non grata na ginamit kan mga honorableng bocal na nasa mayoriya.
An dapat daa persona ingrata ta dae daa nagtao an ganador nin balato sa kairibahan sa bulangan, he! he! he!
Posibleng tama man an paggamit nin Pax et Concordia, alagad sabi kan gurang, baad daa an gustong sabihon mapait an linuwag ni Concordia sa handaan kan pasumpa sa Tucao.
Pag-abot man sa “Concordia res parvae crescent,” dae na niya matungkad an gustong sabihon ta dae daa ini naleksyon sa caton, he! he! he!
Alagad an “Cedant arma togae” puede niya daang hulaan an gustong sabihon: tibaad daa dae tinao an tuga na armas para sa masunod na eleksyon, togaec pano an nanggana, he! he! he!
An mucho amor madari daang saboton, lalo na ta cadacul daang mga opisyal sa capitolyo na kung bakong duwa an naging agom, igua pang mga pigakabrit paminsan-minsan, he! he! he!
Kung talagang dae magcacaoyon an duwang lado, sabi niya, talagang adios sa politica an kapalaran kan mga tabilan sa capitolyo.
Kung mangyari ini, bakong quo vadis an hapot, kundi cua padis, he! he! he!
*****
Segun qui senyor Obispo, bako na daang maogma an isla ta nagkabaranga na an liderato nin banwaan.
Tama an obispo, tunay na nagkabaranga, ta dae nagkaoroyon sa barangaan, he! he! he!
Ini an pagheling kan mga ginurangan na sa politica magpoon pa kan magsabwag nin cuarta an mga Alberto sa balcon kan White House.
Sabi ninda, daeng mangyayari sa presenteng panahon na bako sanang saro kundi magcapira an gasirimbagan sa social media.
Dapat na daang an bise gobernador an magrepresentar sa mayoriya kan junta provincial y makihampang sa gobernador tanganing madiskutir an mga barangaon, ay sala, bagay na dapat maresolveran.
Ta kung dai, zhòngguā dé guā, zhòngdòu dé dòu, sabi kan mga Intsik…