Madeclarar na daa nin giyera an junta provincial laban qui Gob Azanza sa dae pagkasinabotan caini sa QRF, 2026 budget asin, segun sa mga nacaisi, mga deligencias posibles na katakod kan enterong transaksyon sa gobyerno.
Ta tinawan nan in bala nin piskalya an kanyon ni Azanza, posibleng magpaputok na ini nin kaso laban sa Sangguniang Panlalawigan duman sa Ombudsman.
Natural, mabalos man an mga insurectos na mga bocal tanganing bahala na an Ombudsman mag desisyon kung sisay an tama y sisay man an papadusahan.
An masakit sana caini, harimbawang suspendihon an gabos na invuelto sa mga kaso, posibleng diit an sana an matada sa SP.
Kung an gobernador man an suspendihon, an matada sa SP an matukaw harimbawang pabakasyonon man si Bise Gob Obet y pag-iriba, he! he! he!
*****
Kung mag-abot an Hulyo 1, 2026 na dae pa gakaoyon an duwang lado o caya dae pang resolusyon an mga kaso, dapat nang maghiwas an mga afectadong ciudadano para sa recall kan mga maribok na servidor nin banwaanL an gobernador, bise gobernador y mga bocal.
Diyan maheling sa recall election kung sisay an maorag, sisay an iguang basbas nin banwaan, lalo na ta mano-mano an bilangan y barantayan sa escotinyo.
Posibleng madagdagan an lamang, mabaliktad an enot na resulta, makapadagos an cadaclan na bocal o caya matucalan nin mga matanos, he! he! he!
*****
Magayon siguro iyo man ini an gibohon sa gobyerno nacional ta sa heling nin mga constituentes, daeng halaga an mga imbestigasyon sa korapsyon sa DPWH kung magcapira man sanang mga congtractor y mga opisyal an makasohan o makulong.
Kung paluwason siguro an enterong listahan ni dating DPWH Usec. Cabral sa publico, maisihan dindi na halos gabos na mga congresista y senador iguang mga inaapod na “allocables” na fondo para sa mga proyecto y nakinabang sa pagpapabakal caini sa mga contratista.
Igua nganing huringhuding na dacul na sa itaas an pabor na magdimitir an mga halangkaw na opisyal magpoon sa presidente hanggan congresista para malugaran an sarong consejo nin mga toltol na tawo na iyo an magpatanos (bakong si Azanza) kan sistema sa gobyerno, lalo na an DPWH, pangontrata kan mga miembros nin Kongreso y barakalan nin voto sa eleksyon na iyo an mayor na rason kung ngata anas mga mahabas an naelegir sa puesto.
*****
Sinipa na palan sa puesto an duwang halangkaw na amo sa DPWH regional office sa Bicol dahil sa pagka-invuelto sa maanomalyang mga flood control projects.
Maguiromdoman na an oficina bi Director Virgilio Eduarte an saro sa responsable, afuera qui Cong Yoloyo, sa pagpabidding kan binilyon na proyecto na cotana an DPWH Catanduanes District Engineering Office an maimplementar.
Nagresulta ini sa kalugihan kan mga local na contractor y saendang mga trabahador na ngonian daeng mga trabaho, pagbaba nin tax collection nin BIR na soboot binawi sa saraday na negociante pati sirasira store, pagbawas nin kita kan mga hardware store, y an daeng bantay na pagpatrabahong balasubas kan mga nangganang contratistang taga-ibong.
Alagad minsan salidahan si Eduarte, adyan man siempre an poder nin congresista na makialam sa district engineering office na siya mismo an namidbid na hade, bako sana sa pagtaltag nin proyecto kundi pati pagpalaog nin mga tawo.
Depende na sana sa naelegir kung inano an mahaman kan DPWH.
Kung masyadong garapal y masiba, puro daya y daeng halaga an mga proyecto.
Kung tama sana siguro an hagad, posibleng marinas an resulta y mapakinabangan nin awat.