Dagos na ang eleksyon sa District I sa Baras y Gigmoto para sa representante nin mga miembros-consumidores-cagsadiri nin Dificelco sa junta directiva.
Alagad daing ralabanan nin mga patanos contra mga tahodan sa Marinawa, ta saro sana daa an nagfile nin certificate of candidacy, si Director Romeo Santos.
Posibleng igua man sigurong nag-ansyas, alagad baad sinuhay kan mga politicong hade sa duwang municipio.
Caya an mavoto sa Sabado sa Baras Central Elementary School y Gigmoto Central Elementary School baad mirindalan sana an makua, he! he! he!
Dae pang bareta sa Viga, Payo y Bagamanoc sa District VII kung sisay an malaban sa pagka-director, tibaad gacarcula pa kung sisay an mabotwa na kalaban y kung sisay an mamanok sa maabot na derby sa Enero 17.
An ciertong magiging maogma ining pirilian sa Bato sa kahadean ni Alcalde Johnny y Cong Yoloyo ta apat daa an nag-interes sa posisyon na babayaan kan maretirong si Boy Vargas.
Dati na daang nagpasabot na madalagan an hipag kan defuntong GM Raul Zafe, si Salvacion T. Lee, kasabay sinda dating consejal Pedro “Bong” Vergara Jr., an taga-Tamburan na si Romeo Soria Jr. y an operator nin gasolinahan y retiradong BFP chief na si Nelson Marino.
Alagad an huring osipon, tolo sana an nagkua nin COC: Sinda Lee, Vergara y Marino.
Sisay daw an mga politicong mamanok sa mga candidatong ini sa eleksyon sa Enero 24 sa District II?
Sa District III sa Calolbon, an presenteng director na si Alice Gianan Arcilla tatampadan daa nin retiradong pulis y dating bodyguard ni Boboy Cua, si Allan Navales.
Dae pa man cierto kung sinda qualificadong magcandidato ta maagui pa Sinda sa screening kan Dificelco.
Halaton ta na sana an anuncio tanganing maisihan kan mga maquiperac na mga MCOs kung iguang mapatoron ning imo, he! he! he!
*****
Pigreclamo palan nin mga cataning na residentes, pati na an magcapirang padi diyan sa catedral, an mabatang arisngaw nin basurang tinambak diyan sa gilid kan LCC kan nacaaguing semana.
Dagos man daa ini inaksyunan ni alcalde Posoy kan maisihan niya an muromuto kan mga kanatad nin taga-ibong na tindahan.
Dae daa natapos an aldaw, malinig na an lugar y an basura aduman na sana sa hawlang kinahang kan establisimiento.
Ngonian, dae na an maiwasan na mabata an gilid na an kan tindahan, lalo na ta igua daang pigasabod diyan na basura o ati hari sa freezer nin mga carne y iba pang nalalalapang tinda.
Magayon siguro maghengoha man an LCC na bako sanang hawla nin basura an ibogtak diyan kundi toltol na kahangan nin mga nalalapa tanganing nalukdoan lamang.
Arogon siguro ninda an karibal na iguang sadiring trak nin basura na iyong gahakot papuntang dumpsite.
*****
Natapos an Deciembre 31, dae man nagsarado an Center Mall segun sa kahagadan kan provincia sa presenteng manejamiento caini.
Maguiromdoman na pigsingil kan bag-ong administrasyon an companya sa soboot kakulangan sa rental y pakatapos tinawan nin termination letter ma cotana maefecto sa katapusan kan taon.
Kung nagsunod an companya, daculang karibokan sa banwaan ta malaog an bag-ong taom, daeng Jollibee, daeng Mercury, daeng Mr. DIY, dae pang ACC buda an pagayonan sa itaas y mga tindahan na iba.
Ang isyu sa rental o kakulangan sa bayad bagay na pigahoronan sa harampangan kan lambang lado para makapagpresentar nin evidencia na tama an binayad o caya sala an cuentada.
Bako sanang an companyang pigasingil Kundi pati na an mga tindahan y mga parabakal an mareclamo kung pasirahan an enterong Center Mall.