Sa primerong vez sa laog nin duwang decada, daing pila sa Capilihan kan kaagahon nin Krismas.
Dati, alas cinco pa sana, ginatos na an tawong galinya para magrecibe nin regaling bagas hari qui Boboy Cua.
Kumpara kan 2024, kulang ngonian an nagbaratlay o nagviaje papuntang población nin Virac para manghagad nin regalo.
Kung bakong natakot kung magdosnok na naman nin kaawat o caya naisihan nang daing panartag an dating gobernador, he! he! he!
Si dating bise Bos Te an nangregalo nin gustong Krismas kan napiling mga aqui y familia. Igua man nin pila duman sa harong niya pero para sana sat aga-Calolbon.
Sa Virac, an mga nagpabantog sanang nanaltag iyo Sinda Gob Azanza, na nagtao nin ham y tsokolate, pati na si alcalde Posoy na nagtipon nin ma ningcuenta.
Si Bise Gob Obet aduman nanartag sa Payo siring sa saiyang kinaugalian.
Igua man nin mga elegido, lalo na mga bocal y consejal, nagparatago ngona sa harong o duman sa Maynilang kayganda, lalo na sa panahon ngonian na makunit si Santa Claus, he! he! he!
*****
Nagluwas na palan daa an spaghetting pigahanap duman sa Viga.
Alagad duman sana sa piling lugar nakaabot ta limitado man siguro an narecibeng ayuda hari sa senador.
Mayad na an kaysa dai, igua lamang nin pinagbarangabanga sa lamesa.
Su mga nacarecibe nin ham, ciertong inubos na ini, lalo na an mga dae man nin repridyeretor, cabanga sa maluto y an cabanga hungit nin parainom nin Ginebra, he! he! he!
*****
Nangapudan na palan si Monsenyor Lo para sa katoningongan y pagkasararo kan lambang lado sa Capitolyo.
Bako daa ining panahon para sad ae pagkasinabotan o iriwal, sabi kan Obispo, y an gabos na taga-Isla Maogma an hanap man sana asistensya.
An dapat daang gibohon, ringwan ngona an mga personal y political na diferencia, maghororon nin marinas y iguang magcacanigong respeto y sinceridad, asin asikasohon an pangangaipo kan mga tawo, lalo na an mga daeng-dai.
An hapot ngonian kan kagabsan, kung igua lamang nin efecto an ginibong surat ni Monsenyor Lo para qui Gob Azanza, Bise Fernandez y mga honorableng bocal.
Sa mga gaisip pa man nin camogtacan kan banwaan, igua pa siguro.
Alagad sa mga tahodan na sa servicio publico (dae cabale si Nestor y famila), tibaad dae na makataod an todok nin konsiyensya sa mahibod nindang panit.
Saro pa, sa kadinakulan na nin padangog sa social media, posibleng nawara na an respeto kan magcapirang tawo sa magcaibong na lado, lalo na ta nagbuhi na nin mga kalaen na pananaramon.
Sa masunod na iguang thunderstorm o super typhoon, ano daw kung patirindogon an mga maribok na politico diyan sa atubangan nin capitolyo? Helingon ta kung sisay an tamaan nin kikilat o paridon nin hangin.
*****
Bako man sala ni Cong Yoloyo na an distrito nin Isla Maogma tinawan nin lampas tres bilyones pesos na fondo nin Congreso.
Trabaho nin cada congresista na maghanap nin mejoras para sa saiyang constituentes.
An bakong marinas iyo itong gamiton an fondong tinao nin gobyerno para ipakontrata sa sadiring companya.
Kaorihan man sana kan mga namurarat sa bilyones na fondo.
Siring man an caidtong panahon ninda Cong Dayunyor, Cong Cotipyo, Cong Saryo y Cong Hec.
Normal na sa mga congresista, o an saendang mahal na agom, na maging hade-hade o reyna nin mga district engineer sa DPWH y iyo an masunod sa pagpalaog nin tawo y panaltag nin mga proyecto.