Igua na palan nin orden si PBBM sa DILG na daing makakaligtas sa panibagong campanya nin gobyerno nacional laban sa korapsyon.
Segun qui Sec. Jonvic Remulla, gabos daang mga tawong invuelto, minsan pa anong posisyon o koneksyon sa politica o familia, iimbestigahan asin kakasohan.
Dae daang amigo, daeng kakampi, sabi ni Erap, ay sala, Remulla palan, he! he! he!
Madaring magtaram para sa amo nin DILG, por sobre ta an nga nasa baba na mga amo iyo ang maipit.
Uya sana sa Isla Maogma, miembro nin Partido Federal ng Pilipinas si Cong Yoloyo, na puede nang kasuhan nin pagbalga sa Konstitusyon dahel sa P600 million na mga contratang nakua kan ERR Construction Corporation na nakapangaran sa saiyang mahal na agom y mga aqui magpoon na siya magtocaw (bakong tindog) bilang representante kan Distrito nin Catanduanes.
Igua pa diyan nin soboot mga alalay nin mga poderosong politico na dacul an kamidbid sa Malacanang asin mga agencia nin gobyerno.
Papanohon an mga ini kung hagadon kan saendang mga amo sa mga tawo ni PBBM na dae pakialaman ta caipuhan ninda sa saendang pagtocaw?
Siring sa mga nacaaguing panahon, dae matubod an tawo na seryoso an gobyerno sa presenteng laban sa panghab-on sa kaban ni Juan dela Cruz kung dae ninda maheling na makasuhan an mga ini asin makulong.
*****
Sagcod sa ngonian, dae pa gatibwas an tawo namakal sa taga-ibong na groceria na katakod kan katedral.
Nanarian pa sa buy-one-take-one na promo, caya sa enot pa sana daang aldaw, cinco milyones nang cuarta an naglaog sa caja kan mga negocianteng taga-Albay.
Harimbawang nagbaba na sa cuatro milyones pesos an pinamakal kan mga taga-Isla Maogma sa LCC, kabong-kabong na labing cincuenta milyones pesos na an nadeposito sa caja de hierro kan companya.
Kung igua man ining gananciang diez porciento, cierto kitang an gananciang ini aduman na dinara saendang kaban sa ibong.
Afectado an kataraning na negocio sa Virac, lalo na an mga groceria, alagad igua man nin karinasan sa mga habo makisusuan ta malibyano y mayang na an pamakal ninda, he! he! he!
*****
An hapot ngonian kan cadaclan, kung ano na an mangyayari sa Quarta Relief Fund (QRF) nin capitolyo?
Nagpasar nin ordinansa an junta provincial na cuarta na sana an ipanaltag sa mga victim ani Uwan, pigveto ni gobernador ta illegal daa, tapos pig-override kan SP an veto, caya an bola nasa qui Azanza na naman.
Kung dae ini iimplementar kan gobernador ta pigkuwestiyon niya na sa corte an ordinansa, ano man an gigibohon ni bise gobernadora y pag-iriba, kasuhan man an amo sa capitolyo?
Bako nang kaoomok an nangyayaring ini.
Igua na ngani daang nagpadangog sa gobernador duman sa Christmas party nin mga consejal na taposon na an durolak y maghoronhoron na nin lalaki sa lalaki, ta dae man daa mauswag an alcalde o gobernador kung dae an suporta nin consejo.
Sayang daa an tugtog kung saro sana an gasayaw y an saro aduman sa higad gapasay nin caogmahan…
*****
Mayad pa daa sa kahadean ni alcalde Vincent Villaluna sa Bagamanoc ta nagkaoroyon an MDRRM Council y an Sangguniang Bayan sa pangengenotan ni bise alcalde Toho Velchez na cuarta na an itao sa cada familia hari sa QRF.
Inoyonan daa dagos kan consejo an suhestiyon kan disaster council na tig-sanribo an ipanartag magpoon ngonian na semana sa cada family head.
An dapat sanang sigurohon kan saendang familia iyo na dae magamit an diit na cuarta sa pagbakal nin inumon o sigarilyo, kundi sa bagay na pakinabangan kan gabos…