Sagcod sa ngonian, dae pa natapos an debate sa Sangguniang Panlalawigan manongod sa Quick Relief Fund nin Capitolyo na cotana mapakinabangan na kan mga victima ni super typhoon Uwan.
Base sa rekomendasyon kan Local Finance Committee y an PDRRMC, an plano nin administrasyon ni Gob Azanza gamiton an natadang fondo na veinte seis milyones pesos para sa pagbakal nin yero asin iba pang gamit sa labing treinta y cuatro mil na familiang nawaran o nauyagan nin harong.
An gusto man kan mayoriya sa junta provincial barangaon an fondo tanganing itaong cash sa mga afectado ni Uwan. Ini daa tanganing dae na mag-agui sa bidding y dae na pagkakitaan nin sisay man sa laog o luwas nin Capitolyo.
An kaisipan na ini, sabi kan LFC, COA y DILG, sala ta dae man sa reglamento na an QRF ipanaltag na cash sa mga typhoon victims.
An sabi man kan mga honorableng bocal, igua na daang mga LGU na nanaltag nin cuarta gamit an QRF.
Posibleng igua man nin punto an mga elegidong representante, lalo na kung an pacahona ninda an gustong sabihon nin “Q,” Quarta, he! he! he!
Ma sarong bulan na pakatapos kan bagyo, dae pa nahiwas an fondo nin publico na para sa tawo.
Sabi ngani ni TGP Cong. Bong Teves, dapat enoton ngona an para sa tawo, bakong pag-iriwalan an mga procidimiento.
Igua na naman lamang nin maabot na naman na tropical depression bago an kapiyestahan ni Nuestra Señora de Inmaculada Concepcion.
Ngonian, tanganing dae man pagtabogaon an mga honorableng bocal y bise gobernador sa bagolbolon na pagpaluwas nin fondo, bag-ohon an resolusyon na ipasar.
Imbes na an QRF para sa mga victim ani Uwan, apodon na sanang advance na relief para sa mga magiging victima ni TD Wilma, he! he! he!
Puede man ining italtag sa Viernes, bago pa man mag-abot an bagyo, he! he! he!
Mag-iriba an mga PBM na pabor sa cuarta, lalo na itong mga dae pa man talaga nag-aparecer sa mga lugar na tinamaan ni Uwan, he! he! he!
*****
Kung harimbawa man na ultimamente mag-oyon an SP na gamiton an QRF sa pagbakal nin yero o ano pa man na asistencia, magayon sigurong kahoy o plywood na man an ipanaltag.
Igua nang yerong tinao, alagad hanggan sa atop sana ini, dae pang panglanob.
Kung igua pang ikabotbot sa bolsa an mga bocal, puede man sindang magdagdag nin tigsarong kilong pako na de dos y de una.
Kung igua….
*****
Igua na naman palan nin nag-suicide, maestra pa naman.
Sayang na buhay na tinao nin mahal na Diyos, na cotana ginamit tanganing makabilog nin familia.
An victima daa sinundan an katrato na naenot nang nagsuicide man pirang bulan nang nakaagui.
Dae ta man isi kung ano talaga an istorya alagad tibaad pigabasol man an daraga sa nangyaring naenot.
Magdagdag pa an mga parakomentaryo sa social media, na an cadaclan dae man nacaisi kang tunay na dahelan.
Siguro kong hehelingon an datos, lalong nagdakol an mga insidente nin suicide magpoon na magcaigua nin social media.
Masakit pano na gibohon na sentro nin buhay an social media, kung saen an cadaclan mga pakialamero sa buhay nin iba.
Oras na an cada hiro nin sarong tawo, magpoon sa pagbado-bado hanggan sa gigibohon, nakadepende na sa mga soboot amigo y amiga sa social media, mawaran na an tawo nin sadiring pagkatawo.
Sa panahon na ini na pano nin trolls, pekeng account y mga pakialamero an FB, kung gusto mong toninong an saimong isip, dae na mag-post sa social media tanganing dae ka komentaryohan. Kumbaga, magsil-ip sana paminsan-minsan tanganing daeng problema.