Nagvisita palan sa Isla Maogma si Senador Jinggoy Estrada para magpalitrato habang nanaltag nin relief goods sa mga taga-relocation site sa SIV asin garibot-ribot sa EBMC.
Inibahan man daa ini kan satong gobernadora, an saiyang alalay na abogado, an alcalde nin Baras y Virac.
Sa miting diyan sa sarong hotel, nanuga ini sa presidente kan LMP y pitong alcalde na maalocar siya nin cabangang milyon na fondo sa AICS para sa cada municipio.
Dae sinabi kung personal na gastos kan senador an pinanaltag relief goods, na ciertong binakal man sana sa local na tindahan.
An cierto iyo na an cabangang milyon sa AICS na pinanuga fondo nin DSWD, he! he! he!
Inda kung naduhoran nin pangmeryenda an mga alcalde na nag-aparecer sa miting, lalo na ta nangaipo an mga ini nin dagdag na pang-ayuda sa mga constituentes na nauyagan nin mga harong.
Minsan pa tig-diez mil, sinsilyo sana ini kumpara sa soboot tinaong treinta porciento nin P355 milyones kan mga amo sa Bulacan 1st District Engineering Office hari sa ghost flood control project.
*****
Piyesta na naman sa Calolbon sa maabot na Simba, caya inaabisuhan an mga autoridad na magmaan naman sa mayor na tinampo.
Siring sa mga nacaaguing taon, tibaad igua naman nin matigbak sa aksidente nin motor o anuman na vehiculo, lalo na kung bisperas o piyesta pagpararibod kan mga bortok.
Magayon sigurong mag an kagharong o caya an mga kahampang iyo na man an magpugol sa mga gadapay-dapay nang kairiba tanganing dae na magmaneho nin sasakyan, minsan pa kabayo ini o bisikleta.
*****
Pinadagos man siyempre an pagpakudal sa atubangan kan oficina nin DPWH diyan sa SIV.
Tinunong ini pirang semana na an nacaagui matapos paguilomdomon an bag-ong amo na tuyong hinari an dating kudal tanganing magayon na paghilngon an solar.
Segun sa pariwanag kan mga nanunungdan, an bag-ong kudal para daa sa seguridad.
Kung an pigaproteksyonan caini iyo an mga opisyal kan DPWH sa panahon na adyan sinda sa oficina, dae man ining halaga ta maparibod ta maparibod sinda sa kanya-kanyang harong.
Kung igua man nin nakaisip na bawasan an saendang tinabag hari sa bakong marinas na gibo, dae man diyan masalakay an mga mahabas kundi sa harong.
Dae pa tapos an imbestigasyon caya maghanda an mga taga-DPWH, lalo na an mga lantad an evidencia kan saendang tagong yaman.
*****
Pabor sa enterong taga-Isla Maogma an pagtaltag nin relief sa cada harong o familia.
Minsan an bagas bakong dinorado y anas baratohon na delata an laog, nakabawas sa gastoson lalo na sa mga nadistroso an harong.
Duwang aldaw matapos mag-agui si Uwan, an dorado sa saod uminabot sa P260 an kilo, an bukawon P350 an kilo, mga presyo nin maklaseng sila.
Nagbaba na man nin diit alagad dae pa caya kan mga ordinaryong tawo, caya ventaje pang mamakal ka nin carneng orig, P280 sana ang buto-buto.
Dahel sa binagyo man an mga tanuman nin gulay sa Central Luzon, sagcod sa ngonian mahal pa an gulayon.
Imbes na pabor sa salud, an mga presyo nin gulayon y maritatas sa saod makapahayblad: P380 an kilo nin beans, P220 an sitaw, P260 an pechay y talong, P380 an sibuyas, P280 an puro-pagurong y an pinaradpad na halong gulay P110 an kilo.
An barato na sana kangkong, diez pesos an bugkos, mantang an ugbos nin camonte quince na man an saro.
Ano nang pagtios ini….