Ang kaipuhan sa ngonian kan mga tinamaan nin suoy, lalo na itong natabaw an mga harong, mga bado asin gamit sa harong.
Kaipuhan man siyempre an pagkaon asin tubig (bakong inumon na nakaboyong), ta an maluwas sa bombahan maasgad.
Kung harimbawang nataparan na kan Capitolyo y municipio an pagkaon asin nakarecibe na man an mga afectadong familia nin cuarta hari sa DSWD o OCD, magayon na magtipon an sisay man na dae nadanyosan kan bagyong Uwann in piglumaan or dai pigagamit na bado, pati mga dae na man caipuhan na gamit sa harong arog nin sobrang caldero, yero, kahoy, balde, sabon panlaba.
Ipadara ini sa paagui nin simbahan, LGU o Red Cross pati na mga kamidbid na taga-Pandan, Caramoran o Bagamanoc.
Siguradong dae masayang an saimong pigdonar na bagay, makatabang ka pa sa mga nadistroso kan bagyo.
Sigurohon sana tabi na dae na pagbalihon an girisi nang bado, lumang kalson, expired na delata o bolong, huwang caldero o kawari, kalawangon na yero asin appliances na dae na gaandar. Bosong an luwas niyo kaan….
*****
Iyo na daa ito an pinakadakul na mga amo sa gobyerno na nag-abot sa Isla Maogma magpoon kan tamaan kit ani Sening.
Adyan na su Presidente, binitbit pa an magcapirang mga secretaryo nin mga agencia nasyonal. Naghabol pa an sarong senador pati si DPWH Secretary Vince Dizon.
An kagayonan sana kang nangyari dahil ki Uwan ta sa Tubli nangahang si PBBM, bako diyan sa Virac na baguing dae man tinamaan nin bagyo.
Caya personal na naheling kan presidente an sinapar kan mga taga-Caramoran y dagos na inorderan an mga kairiba niyang mga amo na tabangan an mga victim ani Uwan hanggan Sinda makabangon.
An bagui sanang dae mangyayari iyo an saiyang kahagadan sa mga local na opisyal na dae na patugdokan an mga hazard-prone areas arog kan pangpang nin salog asin an mga harani sa baybayon.
Simple man sana an mga rason: dae man nin fondo an LGU para ipambakal nin daga para sa relocation site, minsan pang magtao an National Housing Authority nin fondo para sa pagpatindog nin housing units.
Saro pa, cadaclan kan mga nasakob ni Uwan ga parasila, na ciertong masayuma na sinda maharayo sa saendang mga bangka y dagat na gatao nin hanapbuhay.
*****
Reperi palan ngonian si TGP Cong Bong Teves sa duwang gabanggaan na lado sa Capitolyo.
Tolong vez daang nagpamiting an congresistang taga-Baras para ayuson an dae pagkasinabotan kan junta provincial y an oficina ni Gob Pata.
Sagcod palan kan nacaaguing semana, dae pa nakumpirma kan SP an mga appointment nin bag-ong mga amo sa manlaenlaen na oficina nin Capitolyo.
Kasabay na daa dindi an pag-aprobar sa realignment sa fondo nin magcapirang proyecto para idagdag sa Calamity Fund.
Nag-aparecer na daa sa sesyon an taga-PDRRMO asin an mga miembros nin Local Finance Committee para mag-apelar sa mga honorableng bocal alagad dae pa man inaksyunan.
Igua man daa panong pigahagad an liderato sa SP sa campo kan gobernadora, na sagcod kan Simba dae pa man nin karinawan.
Saro daa sa hagad kan kahuruhalangkawing opisyal iyo an confirmation kan saiyang mga tawo.
Madari sana siguro ini lalo na kung dae man nin kaso o maraot na reputasyon an kinahang sa puesto.
An masakit iyo an soboot gusto kan Osip of the Governor na harion si PBM Bani y PBM Arnel sa pag-chairman kan poderosong comitiva na saendang nakaputan.
Ini an Appropriations y Infrastructure na dati nang tinao saenda kan ga-holding hands pa sinda sa saendang amo.
Ta anas ini mga politico, pati na an gobernadora, puro ini nangaipo ning kung ano, magacaoroyon minsan gairiwal, he! he! he!