Sa enot na vez, bako nang matawo ang lumang sementaryo sa Palnab pag-abot nin banggui.
Haruga na an mga eskinita sa paribot nin mga pantiyon, minsan sige pang rilibot an mga soltero y soltera na bako man tigbak an hanap kundi an mga buhay.
Aduman an cadaclan sa Himlayan ni Nonong kung saen pareho na palan sa aeropuerto na iguang parking fee na cincuenta pesos sa mga awto y treinta pesos sa mga motorsiklo.
Kung quinientos na mga vehiculo an nakiparada duman sa laog, veinte cinco mil an ganancia kan Himlayan sa Virac, sobra-sobra pang pambayad sa mga parking attendant y mga alalay sa sementeryo.
Sabi ngani nin sarong taga-Maynilang kayganda, dapat daa kabali na sa servicio kan Himlayan an pagtao nin parking area sa mga mavisita pareho man kan mga namasyar sa mall.
Obligasyon daa nin memorial park operator na magtagama nin paradahan kan mga carruaje y kabayo kan mga mavisita nin gadan nindang mga mahal sa buhay.
Igua pa ngani daang diskriminasyon na naheling, na duman daa sa Himlayan sa Calolbon, daeng bayad an parking.
Makandidato pa man siguro an dating alcalde, oras na malampasan an kasong graft and corruption sa RTC.
Dae na baleng mahayblad an mga taga-Virac, ta dae man mavoto sa Calolbon, he! he! he!
*****
An mga iguang ikabakal nin apartment sa gadan sa mga memorial park naengganyo nang ibaryo an mga tol-ang kan saendang mga mahal sa buhay na adyan sa mga pantiyon sa Catolicong sementeryo sa Palnab.
Ini daa por sobre sa plano kan diocesis na garabaon na an mga lulubngan sa paribot kan sementeryo tanganing ikahang an mga laog caini sa mga apartment sa gilid.
An saro ngani daa siningil nin once mil pesos para sa paglipat kan saiyang gadan duman sa bag-ong kahangan. Kabali na man siguro an moroso nin pilang taon sa siningil.
Awat nang panahon na dae na gabarayad nin arquila sa pantiyon an cadaclan kan mga familiang nagadanan, caya ngani siguro dae napapatanos kan simbahan an sementeryong luma asin bag-o sa Palnab.
Dae nang makanghan an mga bag-ong tigbak caya caipuhan nang ilipat sa saraday na estaran an mga naenot nang nalapa, lalo na ta dae man daa puedeng ilubong nin patindog an sisay man na maotsan magpoon sa 2026.
Caya an magayon caini, kung sisay an iguang capital, mag-establisir na nin crematorium tanganing bako nang ginhawa sa laog nin kabaong an ilubong kundi abo sa saday na lata.
Tanganing dae na pagdarhon sa harong kung saen tibaad mapagkamalan pa ining basura, an mga lata nin na-cremate ilaog sa mga apartment sa sarong columbarium.
Para magdecidir an mga negociante, tugotan pa sindang isabay sa crematorium an ibang negocio: barbecue house, bakery, gibohon nin salming asin pandayan nin tabak tanganing dae masayang an sobrang init, he! he! he!
Marinas man pati an cremation, lalo na mga politico, congtractor y mga taga-DPWH, na dae na masyado caipuhan ang calayo ta dati na daang tutong an calag, he! he! he!
*****
Grabe daa an dae nabakal na burak kan Todos Los Santos.
Nakaisip na daa ngani an mga local na paratinda caini na hagadon sa mga LGU na ipagbawal na an paglaog nin mga taga-ibong na paratinda.
Baguing masakit man ining gibohon lalo na ta bukas na daa an negocio sa Isla Maogma, sabi ni gobernador.
An magayon, dagdagan an saendang servicio. Kung puede, igua nang package deal, sinda na madara kan burak sa kung saen na pantiyon, apartment o mausoleo, y sinda pa an mapatente nin kandila.
Masqui dae na magvisita an mabayad, he! he! he!