Isinang-at na daa sa Kongreso ang reklamo kontra qui Cong. Yoloyo sa pagbalga sa probisyon kan Konstitusyon manongod sa conflict of interest kan mga miembro nin Senado y Kongreso.
Alagad segun sa mga nacaisi, dae pa man nin record ang Batasan kung talagang naresibe na an reclamo.
Segun sa Section 14 kan pinakahalangkaw na ley kan Polipinas, bawal an mga senador o congresista na direkta o bakong direktang makinabang sa ganancia o mag-interes sa anuman na contrata, prangkisa o espesyal na pribiliheyo na itinatao kan gobyerno o anuman na oficina caini, sa laog kan saiyang termino.
Dati nang nakabali an pangaran kan gatocaw na kongresman sa listahan nin inaapod na “politicontractors” o mga opisyan nin gobyerno na may sadiri nin kompanya o kaya agom o kapamilya an kagsadiri nin kompanyang nanggana nin contrata sa gobyerno na pinondohan nin parabayad nin buwis.
Sabi sa ebidensya na base sa records kan DPWH, magpoon na magtocaw an congresista kan Hunyo 30, 2022, an dati caining kapot na negocio, an E.R. Rodriguez Construction Corporation na ngonian nakapangaran sa saiyang mahal na esposa, natawan nin tolong flood control projects sa Maynilang kayganda.
An mga proyectong ini na nagkakahalaga nin suma total na P294 million, anas nasa ciudad nin Paranaque y an mga contrata pinirmahan kan 2023.
Saro pang kumpanya, an Euro Construction and Supply, na an oficina nasa Batalay y soboot nakapangaran sa sarong aqui kan congresista, nakakua man nin duwang flood control project sa Paranaque kan 2023 y 2024 na an suma total na halaga umibanot sa P53 million.
Dae pang osipon kung noarin ini aaksyonan kan Kongreso y kung ano an magiging kapadusahan, Maghalat sana an gabos…
*****
Piga-areglo daa cotana kan dating alcalde nin Gigmoto an campo ninda Rodriguez y Teves alagad iguang naghabo.
Dae daa matugot an gatindog na congresista hanggan dae maghagad nin dispensa an congresistang taga-Baras, he! he! he!
Masakit-sakit ini, madelubyo na siguro sa enterong kinab-an, dae pa masungko an taga-Baras sa taga-Calolbon y taga-Bato, he! he! he!
Iyo man an mangyayari sa mga invuelto sa giyera politica sa Isla Maogma.
Matapos man an termino kan kahuruhalangkawi, aban-aban sana an aparecer caini sa mga corte para hampangon an mga kaso kan mga soboot Intsik na Pilipino y an saendang mga negocio.
Tibaad panahon nan in campanya sa 2028, dae pa natapos an pagbista sa mga kasong ini, he! he! he!
*****
An huringhuding kan mga nacaisi, bako sana daang tolo an Intsik na tinarget kan mga personaje kan Bureau of Immigration diyan sa negociong soboot pagsadiri ni dating Gob. Siliwong.
Maguiromdoman na kan nacaaguing semana, dinakop an duwang lalaking dayuhan hari sa Tsina na daing visa y saro pang babayi na iguang special visa alagad anas daing permiso magtrabaho sa Pilipinas.
Totoo palan na iguang mga nagdagsang mga Intsik sa Isla Maogma alagad bako man na dara kan mga Cua kundi kan saiyang dating kalaban.
Magayon na an mga ciudadano magmaan sa mga negociong ini ta tibaad banggi sana garuluwas an mga estrangherong taga-Tsina para dae mahalata kan mga autoridad.
Kung mga parabuso nin boto-boto sa dagat, posibleng dae pa makadanyos pero kung iba man an trabaho, delicado an banwaan.
Maguiromdoman na hanggan ngonian dae pa nadadacop an mga Intsik na soboot mga paratimpla nin shabu diyan sa laboratory sa Paltang Saday kan 2016.
*****
Sagcod ngonian, nanarian pa an mga taga-isla sa Mang Inasal ta pigaabot pa nin banggui an pila.
Kung sabagay, nanibago pa caya an cadaclan gusto makanamit.
Alagad saro sa dapat prepararan, iyo an paglangkaw nin kaso nin diabetes, hayblad asin pagbotog nin ginhawa por sobre sa kahahabhab nin manok y unlirice na sinawaban nin chicken oil…