Mayad pa daa ang Emerald Hardware ta nanaltag nin pako buda plywood duman sa mga maafectaran cotana kang bagyong Opong kung nagdiretso sa Isla Maogma.
Sayang na an ibang mga establisimiento, kung harimbawang dae kayang manaltag, naghingoha man cotana na magtao nin discuento sa mga mabakal nin pako, pisi, plywood o yero.
Baguing daeng dangog ang duwang congresista sa Batalay House of Representatives, nagpaikrup duman sa mansion sa Maynilang kayganda na an mga lamesa, tocawan, kubyertos, plato y platito anas gold plated.
Dae nagluwas an katas kan kalakaran sa DPWH, habo mabawasan an natipon, he! he! he!
An pagcaisi ko, dae pa man kinahang sa freezer an mga bank account kan duwang representante y an mga companya caini sa construction.
Alagad, base sa mga nangyayari ngonian por sobre sa imbestigasyon sa anomalya sa flood control projects, posibleng pigluwas na sa bangko an mga nakadepositong milyones para itago sa condo, mansion, o kung saen na caja de hierro.
Iyan an normal na gigibohon kan sisay man na mahab-on, ipasiguro na an mga tinabag tanganing dae mabawi nin kadsadili o kang pulis.
An masakit sana caini, kung an ibang tawong nakaheling kan mga male-maletang cuarta, matentaran na magsimit o caya mangagda nin ibang makaguyod caini paluwas sa kalye.
*****
Sabi nin sarong dating nagdawdaw sa mga bidding-bidding diyan sa DPWH Catanduanes, kung bako sanang masyadong pakialamero an duwang representante nin Batalay, igua pa man nin ganansyang diit an mga contrata.
Caidto daa, diez porciento sana an obligasyon kan mga contractor sa politico, madagdag pa nin tres porsiento na babarangabangaon nin mga ingeniero y cairibahan, y un porciento para sa auditor. Igua man siempre nin sadiring kupit an district engineer, caya kung susumahon tibaad halangkaw na an veinte porcuentong kabawasan sa fondo kan proyecto.
Ngonian, sabi kan contratista, dati nang ocho hanggan trese porciento para sa DPWH asin veinte porciento para sa congresista.
An cuentada pa kan deligencia ni Cong, nakabase sa fondong kabilugan, bako sa presyo kan contrata.
Harimbawa, bakong bidding-bidding an nangyari y nagborosohan an mga contratista sa cien milyones na proyecto, an kukubrahon kan honorable base sa cien milyones imbes sa otsenta y cinco milyones na winning bid.
An gustong sabihon, bahala na kamo mag-iriwal sa bidding, basta an ki Cong, veinte milyones eksakto.
Caya an matada na sana para sa proyecto sisenta y cinco milyones na babawasan pa kan quince porciento para ki DE, sa mga aagihan kan papeles y sa auditor.
An tada, cincuenta y dos milyones pesos o halos cabanga na sana kan orihinal na fondo.
Iyan an dahelan kung ngata dae pa ngani anom na bulan, barakbak na an baldosa sa calle y baratak na an dike sa salog.
Pasensya an banwaan na sige sanang pabakal kan saendang voto sa mga mahab-on na candidato, pwe!
*****
Poon kang magtukaw sa puesto an mga bag-ong amo sa Capitolyo, duman na palan nagkua nin krudo y gasoline sa Silangan ta habo na makitransaksyon sa Powerzone.
An problema, dae ginana kan Silangan an bidding na ginibo caya habo na magtao sa mga taga-capitolyo, lalo na ta uminanot na nin P600,000 an bayadan.
Ang gusto daang mangyari kan administrasyon ma-disqualify an nanggana sa bidding.
Alagad, delicado ini sa mga miembros kan BAC, lalo na kung darhon sa corte an isyu o caya kasuhan sa Ombudsman an mga invuelto.
Habang dae pang solusyon sa problema, magayon na magpa-bidding ngona an provincia nin pirang gatos na biskleta tanganing dae maparalizar an gobyerno….