Mayad man na daeng nag-aparecer na politico sa rali laban sa mga korap kang Simba, Septiembre veinte uno.
Cadaclan jovenes an nag-martsa laban sa mga mahabas na mga politico sa Kongreso asin Senado, pati na mga opisyales kan DPWH, na invuelto sa mga maanomalyang flood control projects.
Sa nangyaring ini, dae nahaluan ning politica ang protesta.
Baguing masakit man sa mata na maheling an tolong congresista kan Isla Maogma (an gatocaw, an gatindog y an partylist) na makisumaro sa kahagadan kan mga Jovenes, lalo na ta an duwa sa saenda napatunayan nang nakinabang sa flood control projects bako sana sa isla kundi sa Maynilang kayganda, he! he! he!
Sabi ngani kan mga nacaisi, nagpasiguro daa an Campo Camacho y nagpadara nin pulis para bantayan an halangkaw na trangkahan sa Great Wall of Batalay duman sa Bato pati na an oficina kan TGP sa Calatagan Proper sa Virac, he! he! he!
Igua man nin mga nakaistasyon na pulis duman sa ruta kan martsa, anas iguang bitbit na pamakol sa sisay man na masalang maghuramentado.
Nagpalabas pa ngani an mga pulis duman sa Virac fountain na daeng gaturawis na tubig tanganing mapaogma an mga Jovenes nahabo magpartisipar sa protesta.
Puede man cotana an gobernador, bise gobernador, bocal, alcalde, bise alcalde y consejal na mag-iba sa rally alagad baad sitaron kan saenda man na gibo habang nasa puesto.
Bako man na mga ignorante an mga ciudadano sa mga transaksyon sa irarom nin lamesa, lalo na an SOP hari sa mga contratista, diez porsiyento sa mga supplier y mga paikim kan mga gahagad nin pabor lalo na sa pagpababa kan singil sa mga permit.
Cadaclan man dindi nakinabang sa mga mejoras hari sa bakong marinas na agui, lalo na sa panahon ngonian na nanganaan an mga ini sa mga parahagad nin tabang ta makunit daa an gatocaw sa Capitolyo, he! he! he!
*****
Napaghoronan na naman kan publico (kaibahan an familia ni defuntong Nestor) an pagpaturi kan mga aquing lalaki.
Ini matapos na mapabaretang duwang casual sa Capitolyo an natangkas sa trabaho matapos na isurat sa tap-og na dae naturi an kahuruhalangkawi, he! he! he!
Minsan sugot man sana an ginibo ka duwang sutil, bako man totoo na iguang efecto an pagpaturi sa paghalangkaw nin sarong aqui, na kung dae ka magpaturi, dae ka mahalangkaw.
Segun sa pag-aadal, an dahelan kan tindog nin sarong aqui iyo an hormones, pagkaon asin an genes.
Natural, kung kulang man sa sustansiya an kanoon nin aqui, bansot man an talubo, pareho sa tinanom.
Kung hababa man an magurang, milagro kung six-footer an mga ogbon.
Dae man nin problema sa pag-ubay kung bakong turi an lalaki, ta igua nganing mga supot na alisto sa pag-ilaid y nakaduwa o tolong agom, he! he! he!
Kaorihan niyo sana….
*****
Igua na palan nin nagsuruntokan sa Capitolyo dahil sana sa pagpila sa People’s Day.
Alas siete pa sana nin aga, gapirila na an manlaenlaen na mga tawo hari sa mga banwaan nin Isla Maogma para sana makaresibe nin food packs hari sa DSWD.
Mapalista ngona saka ipalaog diyan sa Capitol Dome kung saen mahalat-halat nin diit na oras hanggang mapano nin lobot an mga tocawan.
Pag pano na, saka na aapodon an kahuruhalangkawi tanganing magpataratara sa mga naginibohan asin mga gigibohon para sa kamad-ayadan kan publico (cabali an mga macuapo ni Nestor).
Pakatapos caini iyo an pagtaltag kan kahon na an laog bagas, delata, Milo asin kape para sa duwa o tolong aldaw na konsumo.
Pasensiya an daeng imo ta dae nanaltag nin pamasahe asin mirindalan….