Kung an nangyari sa binayaan na school building sa Viga RDHS an babasehan, maluwas na bako man gabos na mga proyectong nakalista sa pangaran kan Alpha & Omega Construction, St. Timothy Construction y St. Gerrard Construction asin iba pang mga companya kan mga Discaya sinda an nag-implementar.
Segun sa mga gilomdom kan mga nacaisi, igua daang taga-QC na namundag sa Payo an nagvisita sa Isla Maogma kan 2018 y nag-entra sa pa-bidding kan mga school building sa DPWH.
Limang proyecto an ginana caini – tigsaro sa Viga, Gigmoto, Bagamanoc, Bato y Caramoran – asin an mga ini pinun-an kan capitalista kaibahan an sarong local na opisyal na gapalayog nin maldos.
Alagad, pakatapos nin pilang bulan, binayaan na an mga proyecto na nakatiwangwang. Naubusan daa nin capital, tibaad nadaog sa derby, he! he! he!
Napilitan ngani daa an mga Discaya na magbayad kan liquidated damages dahil sad ae paghaman kan mga proyecto.
Buhay pa man daa an duwang invuelto sa isyung ini alagad baging bako na man na mga contratista kuno.
*****
Saro pa daang dae nahaman na proyecto sa Viga iyo an Natunongan dam sa barangay Rizal na ginastosan nin sisenta milyones kan DPWH pirang taon na an nacaagui.
Diez metros daa an dapat na langkaw caini alagad apat na metro sana an nahaman ta kulang an fondo.
Ngonian dae man ini nagamit matapos na inaguraran ta dae man cabale an mga tubong masugpon sa linya kan Viga Water District,
Saro pa, habo man daa magtugot an mga opisyal nin barangay na ikabit ini sa Viga water district kung dae sinda tatawan nin veinte cinco porcientong parte sa ganancia hari sa tubig, he! he! he!
Sa ngonian, ni dae na ngani daa ini nakarigosan ta nalubong na nin tilis.
Na-turnover daa ini sa municipio alagad baging dae man sinda nin cuarta para ipatapos an proyecto, pati na an pagkumbinse sa consejo nin barangay na itugot nang pabuloson an tubig sa linya kan water district.
*****
Magayon siguro na an amo sa Provincial Tourism Office pati na an mga para-post sa Facebook sa capitolyo makaabot sa Obi, Caramoran.
Puedeng gibohon na tourist spot an pinakahalawig na flood control project sa enterong provincia, na kung susumahon mo ang pagkahalaba malampas siguro nin anom na kilometro.
Dakul pating istorya an magagamit kan sisay man na tourist guide sa pag-entertain kan mga turista, he! he! he!
Puede man na imbitaran an mga para-ehersisyo sa boulevard na duman na ngona magdalagan o maglakaw ta mas mafresco an hangin, puede pa mangarigos sa salog.
Makahagad pa nin tabang sa mga daeng trabahong ingeniero sa DPWH na iyo an mapariwanag kung pano ginibo an mga dike, sain ini kinahang na mga lugar na dai ini mapakinabangan y kung saen an daya kan contratista, he! he! he!
Gamiton na an coaster kan capitolyo tanganing komportable man an mga masakay, lalo na kung an mga ini mga orag-oragon na mga bocal y consejal na mapasikat naman sa Facebook, pwe!
*****
Opisyal nang nagpoon an giyera kan duwang lado nin mga congresista sa Isla Maogma.
Enot nang nagpaputok nin kanyon si Cong Bong Teves, gamit an atrasadong proyecto sa Minaabat.
Kung ano man an isimbag kan duwang congresista kan Batalay House of Representatives, dae pa cierto, Halaton ta na sana.
Parte na ini nin campanya para sa 2028, minsan dae pa man sigurado kung an mga congresistang ini nakatocaw pa sa katapusan kan taon.
Tibaad dae na masib-o an kalayo sa flood control projects y sipaon na entero an mga invuelto….