Minsan personal nang nag-aparecer sa oficina ni DE Simon Arias an gobernador, baguing dae pa man nin pagbabag-o an bagolbolon na patrabaho kan GCI Construction diyan sa tampad kan Cesar State University.
Nagbuhos man nin veinte metros, alagad duman sa tampad kan bakanteng lote pakalampas kan Real St., bako sa atubangan kan escuelahan.
An dati pang tinosang na mga baldosa na puede na cotanang buhusan, nakatiwangwang pa man siempre. Aban-aban sanang ralakaw-lakaw kan mga trabahador kan kontratista o subkontratista para sana siguro maheling na iguang trabaho, pwe!
Dae man nin pakialam si DE Arias y pag-iriba ta an nakaboot sana sa mga proyectong daracula iyo an oficina ni Regional Director Virgilio Eduarte.
Segun sa mga chismoso sa SIV, sala an oficinang napuntahan ni gobernador.
Dapat duman daa siya nagtoktok sa tunay na oficina nin DPWH sa rikod kan Great Wall of Batalay.
Aduman daa an tunay na amo ni DE Arias, na dae pa sana naawat, dati nang nanaltag nin polyetos na iguang listahan nin mga proyecto sa Isla Maogma na soboot pinondohan ni Cong Yoloyo.
Dae man siguro masayuma an guardia civil sa duwang Escalon na guard house na palaogon an bag-ong amo sa capitolyo ta bako man siyang arog sa ordinaryong ciudadano na para-solicit nin diit na tabag, ay sala, tabang palan.
Alagad sa panahon ngonian na mainit an mata nin mga ciudadano sa mga flood control projects, si Cong Yoloyo y mga pag-iriba puede ser na gapatago y ciertong manegar na saenda an mga proyectong ini.
*****
Magayon na maimbestigaran an seawall duman sa Batalay na enot nang pigtrabaho kan ERR Construction.
An primerong parte daa caini mga daraculang bato an laog kan dike, alagad sa icaduwang phase, dugi na an palaman sa kapagbootan kan DPWH regional office.
Igua pa nganing video na nagluwas caidto na an ginamit na tubig sa paghalo nin kongkreto hari sa dagat. Duman pa sa baybayon mismo nagkua nin baybay an contratista gamit an payloader.
Cotana, kung sisay man an makusog an boot sa Sangguniang Panlalawigan, paimbestigaran an mga proyectong flood control y seawall na ginibo sa Islang Maogma magpoon 2022 hanggan ngonian na taon.
Bako sana sinda an mag-imbestigar kundi isabay an mga toltol na representante nin mga NGO y CSO tanganing masigurong daeng lagayan na mangyayari.
*****
Cincuenta y dos nang mga alcalde an nagbali sa Mayors for Good Governance (M4GG) na pinamamayuhan ni Baguio City Mayor Benjamin Magalong. Saro sana an taga-Bicol, alcalde kan San Jose, Camarines Sur.
Igua daw nin mangahas sa Isla Maogma na makisumaro sa pangaturogan kan grupong ini?
An anom sa mga nakaluwas na alcalde kung bakong mga contratista man, may tugang o singaking contratista. Entonces , makaafectar sa hanapbuhay caya dae puede, minsan pa magsagin-sagin na anghel.
An lima man kung bakong kaalyado gapalukob-lukob sana sa municipio, iguang koneksyon sa mga kongresistang contractor o nanaltag nin contrata sa mga kaalyado.
An puede sana sigurong maging miembro kan grupo ni Magalong iyo si alcalde Aly Romano nin Calolbon, alagad baad mapugulan kan icatolo y gatindog congresista, na dati nang nagsabi paka-eleksyon na siya an nakapagana sa aqui ni Tay, he! he! he!
*****
Duman palan sa Obi y Hitoma, an cada gilid nin salog napatos na nin dike na iguang tinampo sa ibabaw, minsan kapungkuhan an inagihan. Igua ngani daang pungko na napatos nin river control, he! he! he!
Sisay daw an enot na mapadara nin video sa Malacanang?