Pati palan mga municipio, sakop na kan poder nin Batalay House of Representatives.
Ini daa an nagluwas kan nacaaguing semana sa Calolbon matapos na apudan kan gatindog na congresista si mayor-elect Doc Aly Romano.
Segun sa mga chismoso sa municipio, sinabihan daa an gatindog na congresista na an mga proyecto kan pinalayas na alcalde pina-bidding na daa gabos kan ingeniero municipal, caya an nasabing opisyal harion daa sa puesto pag-abot nin Hulyo uno.
Inapodan ngani daa an saro pang amo diyan sa LGU na an mga daraculang proyectong natada an Balatay Construction na an mapagibo ta sinda man sana daa an naggastos para manggana si Doc Aly, he! he! he!
Baguing sala na man ini, ta masque dai nagtao nin cuarta an doctor, cierto an saiyang panggana lalo na ta habo na man daa an mga ciudadano sa dating alcalde.
Dapat pa ngani daang magpasalamat an duwang congressman nin Bato ta nabitbit pa ni Doc kan nacaaguing eleksyon, ta kung dae, tuwad cotana ini sa kalaban.
Kung iyo ini an ginibo sa Calolbon, tibaad iyo man ini an mangyayari sa Virac: kukuahon man an cadaclan na proyecto qui alcalde Posoy ta sinda an naggastos para sa dies y siete mil na voto kan alcalde.
Aber daw kung mangyari….
*****
Nagharampangan palan sa Maynilang kayganda an matocaw na gobernadora y an mga daculang tawo nin TGP, partylist y fraternity, sa pangenenotan ni Cong Bong Teves.
Segun qui brod Pat, hinagad niya daa sa congressman nin Baras na itao na gabos an mga proyecto caini sa capitolyo, magsararo na an mga alcalde y ibang politico na kapot kan TGP, y harion na an barayadan nin voto sa pag-elegir nin federation president nin SK, consejal y capitan nin barangay.
Sa mga tahodan na parasunod nin politica sa Isla Maogma, puede pang mangyari an panduwa y pangtolo, depende na an sa hororon kan mga poderoso.
Tanganing makua an mga alcalde, bise alcalde y consejal na makiayon sa capitolyo, natural nang iguang ipanuga na mejoras o kung ano.
Posibleng dae mangyari an “keeping” sa eleksyon kan PCL, ABC y SK, alagad bako man bawal na an mga candidato caini pati an mga votante visitahon nin mga politico, cabale na an gobernadora, para kumbisihon na iboto an sisay man na candidato.
Mahanap ta mahanap nin paanos an mga desidido, siring sa ginibo kan malaog na gobernadora kan nacaaguing eleksyon.
An baging dae mangyayari iyo an pagdara kan mga proyecto nin TGP sa Isla Maogma.
Magpoon pa kan 2022 pagtocaw kan duwang congressman nin Batalay, dati nang pigasingil nin tres porcientong parking fee an gabos na proyectong hari sa luwas na idara sa Isla Maogma.
An parking fee na ini pigabayadan nin advance duman sa DPWH Batalay Engineering District.
Caya ngani sa laog nin sobrang duwang taon, halos sarong bilyon na halaga nin proyecto an dae na dinara sa Isla Maogma kan TGP asin iba pang mga politico.
Sa suhestiyon ni Azanza, an cuarta idara sa capitolyo y an provincia an mapa-bidding, tanganing dae na mag-agui sa DPWH ni DE Arias na kapot sa taringa kan gatindog na congresista.
Ang hapot; ano ang mangyayari sa barangaan?
*****
Abril pa palan inanunsyo ni PBBM na an gabos na municipio sa enterong Pilipinas makaresibe nin tigsarong Patient Transport Vehicles o dae lisensyadong ambulansya, y an iba ngani makaduwa.
Ang cierto caini makaresibe nin saro ang daeng PTV y an dati nang igua, posibleng makaduwa, lalo na kung talagang nangangaipo