Bako palan na sarabay an pagpasumpa kan mga ganador sa nakaaguing eleksyon.’
Naenot na an elegidong gobernador na si Doc Pat na nagsumpa sa atubangan kan capitan nin Tucao, an pinakaharayong barangay nin San Miguel kan Hunyo ocho.
Sinabay na pati an saiyang pagselebrar duman sa E-Crown Hotel kung sain ginibo an Medical Caravan kaibahan an mga volunteer na doctor asin health workers.
An pagpasumpa sa Tucao asin an medical mission, bako an magarbong handa, segun sa mga kaalyado senyal sana kan obheto kan matucaw na amo sa Capitolyo na prioridad an mga harayo asin an mga nagtitios.
Masunod man yata sa atubangan nin juez an mga miembros nin junta provincial sa pangengenotan ni Bise Gob Obet Fernandez sa Junio veinte ocho alagad dae pa cierto kung adyan sa Legislative Hall o kung saen.
Kung ano ang mangyayari sa Junio treinta sa Capitolyo asin mga municipio, maisihan ta na sana sa ngonian na semana sa pagmiting kan mga transition team sa mga local na gobyerno.
*****
Nagpatanid na palan an matucaw na bag-ong hade na voluntad nang magharari an mga empleyado y opisyales sa Capitolyo na iguang mga salang gibo.
An mensahe caini, dae na sinda maghalat na sipaon kan gobernador sa masunod na anom na bulan.
Maguiromdoman na igua nang mga trabahador sa Capitolyo sa mga manlaenlaen na oficina an nagsabi na nahagas sinda sa malaog na bag-ong amo, na soboot istrikto sa trabaho.
An gustong sabihon, dae na puede an mga pagtukaw-tukaw, an pagdayan para maki-marites, malayas sa oficina ta maparibod sa harong, makaturog sa lames asin iba pang mga kaburadan.
Alagad, dae sana daa matakot an mga talagang iguang gibo, minsan ngani iguang mga nagsuporta daa kan campanya na gapadangog na sinda naman an matukaw sa trono, sinda naman an maboot, he! he! he!
Natural ini sa pagbago nin liderato, ta nangyari nak an panahon ni Manay Siliwong.
Magpasensya na sana an malasayan, magbilang nin aldaw sa calendaryo sa masunod na tolong taon, he! he! he!
Puede man na magtanom na ning gulay, camonte, hopi, moros y mga kahoy na mabinunga tanganing igua lamang nin hanapbuhay. Mas magayon ini sa sige sanang sipa ning lata, he! he! he!
*****
Mabogtak na palan an LCC nin duwang tindahan sa Virac.
Ini daa bago pa man nangyari an campanya.
Nabakal na daa caini an daga diyan sa canto nin Calatagan sa may atubangan nin Fiat.
Igua na man daa ining contrata sa simbahan na an edificio kan dating ICSA gagabaon y an lote sa rikod kan catedral tutugdokan ning tolong escalon.
Saro man daang negociante an gaplanong magbogtak man nin saro pang gasolinahan sa Virac. Pabor sa mga consumidor….
*****
Sagcod sa ngonian dae pang aviso kung noarin matiripon an mga miembros kan Board of Regents nin CatSU para magpili nin bag-ong presidente.
Dae man nadagos an miting kan nacaaguing semana sa kung anong rason.
An huringhuding hahalaton ngona macatocaw an bag-ong representante kan mga estudyante ta baad kulang numero kan mavoto para paganahon an favoritong manok kan mga nanunungdan.
Saro pa, tibaad halaton man an pagtocaw kan bag-ong amo sa Capitolyo tanganing biyo-biyo na an paggamit nin influencia sa miembros nin BOR o saendang mga representantes.
Ventaje na daa an nakasiguro na gana sa pirilian, bakong arog sa lotto na tsamba sana an pag-asa.