Namomotan kong mga tugang ki Cristo,
Bilang mga katiwala na linalang nin Dios, inaapodan kita na manindugan para sa katotoohan, justicia, asin sa karahayan kan gabos. An maabot na eleksyon sarong importanteng pagkakataon na makapili kita nin mga lideres na kapareho an mga pamantayan asin makakatao nin paglaom asin pagkasararo sa satong mga komunidad.
An 2025 na Eleksyon igwa nin dakulang importansya. Ini an panahon na kita nagpipili kan mga tawong pinagkakatiwalaan ta pareho kan satong buhay asin futuro.
Dapat maingat niatong hilingon an karakter asin mga katuyuhan kan lambang kandidato tanganing maseguro na an satong mga pagpili makakatabang sa gabos, bako sanang sa nagkapira.
Midbidon ta an mga kandidato na mas ineenot an kapakanan kan nasyon kaysa sa saindang personal na interes.
Hanapon ta idtong mga kandidato na an prioridad, iyo an buhay asin dignidad kan lambang tawo; pagproteher sa lambang familia, komunidad, asin dagkahon an partisipasyon; idepensa an mga karapatan asin otobon an mga responsibilidad; ipamate an mas marhay na opsyon para sa mga dukha asin sa mga lugadan; suportaran an dignidad nin trabaho asin an mga karapatan kan mga trabahador; magtrabaho para sa pagkasararo; asin pag-ataman sa mga linalang nin Dios.
Makamurumundo, an satuyang demokrasya na nadadanyaran kan mga pagpabakal nin boto asin iba pang mga bakong marahay na gibo.
An Bibliya nagsasabi sato, “Mag-adal kamong maggibo nin tama, hanapon nindo an hustisya, idepensa nindo an mga inaapi” (Isaias 1:17).
Ini nagpapagirumdom sa sato na an satuyang pagboto dapat na magpahiling kan satuyang pinakahararom na mga pamantayan-bako sanang personal na pakikinabang.
Kita gabos, ano man an kamugtakan ta sa buhay, siguradong maaapektaran nin resulta kan pirilian.
An lambang boto mahalaga, mahalagang gayo kaya ini hinahanap, binabakal asin minsan hinahabon. An satuyang boto iyo an satuyang boses asin desisyon.
Kaya, ipinapagirumdom niamo an satuyang mga BOTANTE: Kun ipinapabakal ta an satong boto, nawawara an satong boses asin an satong pagdesisyon. Iyan garo man sanang pagtao kan satong katalingkasan asin kan satong futuro.
Satuyang suportahan asin dai ikompromiso an satong mga moral na prinsipyo sa trabaho nin pakikisumaro sa pulitika asin sa pagkasararo nin nasyon.
Sundon niato an satong konsensia, na pinagmamaigotan na papagdanayon na may kamatidan asin tamang konsensia.
Mag-ingat kita sa mga suspetso asin duda. Maging mapagbantay kita asin dakupon an mga naggagamit nin kadahasan, kwarta asin kapangyarihan, o iba pang klase nin pandadaya; an mga nagpapalakop nin kaputikan asin pagkaungis; idtong mga nagmamaniobra sa mga tawo para sa saindang sadiring personal na interes; asin an mga nanlalamang sa mga maluya asin madaling mabiktima.
Asin sa satuyang mga LOKAL NA KANDIDATO: Dapat niatong girumdumon na an panlalamang huli sa kadukhaan asin kadaihan nin proteksyon kan mga tawo tangani sanang makakua nin mga boto o mapauswag an makasadiring pakinabang, ini sa sarong seryosong pagkakasala tumang sa Dios. Hingowahon na mapakarahay an buhay kan satuyang banwaan, orog na kan mga nagtitios, asin mga madaling mabiktima. Ini an pinaka-enot na responsibilidad kan sarong public servant.
Ngonian, an tamang panahon na manindugan laban sa korapsyon. Kaipuhan tang tukduan an satong mga familia, simbahan, asin komunidad na an pagboto sarong regalo na gikan sa Dios, bakong bagay na ipinagpapabakal.
Mantang nagdadangadang an aldaw nin eleksyon, magdanay kitang maimbod sa kun ano an tama. Dai kita magpadaya sa mga falsong panuga o halipot na panahon na mga premyo.
Lugod, an satong pagtubod iyo an maggiya sato mantang kita nagtatarabangan tanganing makatogdok nin sarong nasyon na nakabase sa katotoohan, paggalang, asin pagkaonesto.
Buksan ta an satong mga puso sa Espiritu Santo asin gibohon an satong parte tanganing makagibo ngapit nin sarong totoong nagpapahiling kan pagkamoot asin hustisya nin Dios sa kinaban.
Lugod an katoninongan ni Cristo an maggiya sa satuya mantang kita naglilingkod sa iba asin nag-ootob kan satong sagradong katungdan. Lugod an satong pagkamoot sa Satong Kagurangnan na si Jesus asin sa Saiyang Mahal na Ina pakusogon asin susteniran an satong mga paghingowa sa pagtogdok nin sarong matanos asin matoninong na sosyedad.
Para sa mga clero asin sa mga laiko kan Diosesis nin Virac,
(Sgd.) + LUISITO A. OCCIANO, D.D.
Obispo nin Virac
(Ipinaluwas ngonian ika-4 nin Mayo, 2025 Ikatolong Domingo sa Panahon nin Pagkabuhay-liwat)