Iba na ang estilo ning campanya ngonian.
Cadaclan kan mga candidato, lalo na itong mga tahodan asin hararom an bolsa, dae na gapaapod nin mga pulong-pulong sa barangay.
Dae na daang halaga, ta an cadaclan kan gaatender mga tawo man sana ninda sa barangay. Entonces, sayang lang ang riwoy asin ngalab-ngalab sa tribunasa mga dating kumbinsido na, mapainom ka pa sa mga walang tamoy na dae man gadangog kundi sigeng kuhit sa pulutan, he! he! he!
Kulang na ngani an garibot na mga traysikel o awtong gabuaaw ning jingle kan mga candidato, pati an mga grupong sige sana an panartag nin polyetos masqui dae man an candidato.
An prioridad ngonian na panahon, halos sarong semana na sana bago an eleksyon, iyo an presupuesto sa ultimo hora.
Dae na aakoon an polyetos magpoon ngonian na semana, kundi papel o plastic na hare sa Bangko Sentral.
Igua pa man daang garesibe nin bolong, sabon, shampoo, noodles, pancit, balde, kape, asin iba pang paninda, alagad cadacul nin gahapot sa mga Santa Claus, “Iyo sana ini?”
Herac man an mga daeng imo o kulang an panggastos, an maiduhor sana pang-ewang, he! he! he!
*****
Sa ngonian, an mga garibot na Santa Claus mga sugo kan mga candidato para bocal o consejal.
Dae pa an mga bida sa itaas, magpoon sa bise gobernador hanggan congressman, na an pambubod baad magpoon sa enot na aldaw nin Mayo isabwag.
Cierto na an papel na pangkurukay nin mga Cua asin an duwang warden kan Batalay District Jail mantang si alcalde Samuel ready na man.
An joven pang eredero kan White House, bagas daa an italtag ta igua daang nag-abot sa farm duman sa Palta Saday nin tolong trak. Ngonian, kung an bagas nasa regular na sako pa, medyo caipuhan nin dacul na tawo o panahon para magrepack.
Kung harimbawang cincuenta mil na household o harong an target kan macuapo ni Lesman, saro y may cabangang kilo ning bagas an ipanao kan familia nin duwang dating alcalde.
Sa ibang candidato sa trono nin capitolyo, dae man daang palista an hababa, ay sala, dating halangkaw na opisyal kan Cesar State University, caya posibleng makisabay na sana ini sa Batalay House of Representatives.
Si atorni Puting Buhok gabawas na daa nin votante sa listahan niya, ta sorobra na an saiyang voto, he! he! he! An gusto pa daa magpalista, makaresibe nin moda, he! he! he!
An saiyang karibal sa pamururhihan, an dating heneral na taga-Pandan, dae man daa nin palista, caya an mga mavoto sa saiya, dae na tabi ibali sa pagcuenta nin election bonus, he! he! he!
An duwang candidato para bise gobernadora siguradong matao nin paomok ta mahigpit na an laban. Inda kung magluwas na an ganancia sa pag-arquila nin toga o caya an tinagong deligencia sa junta provincial.
*****
Kung hehelingon mo an background kan mga candidato sa itaas, igua kang mareparong importanteng detalye.
Sa derby kan mga maldos sa capitolyo, si Bos Te sana an negociante sa paagui kan Cua Group of Companies na nag-invest sa manlaenlaen na negocio arog kan VTC, gasolinahan, depot, shipyard y abaca trading.
An gustong sabihon, kung sa burulang, nagpusta siya sa saiya man sanang constituentes na mag-patroniza kan mga negociong ini.
An saiyang mga kalaban dae: an daeng buhok na retiradong heneral dae pa man ginamit an saiyang milyones sa retirement para magpundar nin kung ano sa Pandan y an dating presidente nin CatSU dae pa man nin ginastosan kundi an pagbakal nin daga sa SIV y an pagpatogdok nin palasyo.
Mas maayad-ayad pa ngani an atorning pulpol (sabi kan iguang diploma sa JD) ta nangontrata ini paminsan-minsan y igua pang pigapaarquilang propiedad.
Sa mga gusto mag-congressman, si alcalde Samuel iguang dating companya sa construction y an saiyang esposa iguang sinehan, tindahan nin office supplies asin iba pa.
Iyo, igua man nin construction company an Batalay House of Representatives, alagad baging hanggan sana dindi an saiyang investment sa Isla Maogma.
Ni dae ka ngani makalaog sa laguerta kan mga ini ta an matan-aw mo halangkaw na kudal na iguang barbed wire pati an guard house na duwang Escalon.
An mag-amang Sanchez man nagparpamakal sana nin daga alagad dae pa man nin ginibo dindi. Iguang pinundar na estasyon nin radyo, alagad tinonong na ta maluya an manejamiento, dae daa ngani nakabayad sa inarquilahan na mother station.
Puede pa si Salimao ta paraoma ini, minsan gahalat na kuahon siyang mekaniko nin eroplano.
Saro pa, bako gabos na mga candidato naghengohang mag-asenso sa Isla Maogma arog sa mga Cua o qui Laynes.
An mga dating halangkaw na opisyal nin CatSU y Philippine Army parehong awat sa luwas kan isla y nag-abot sana para magcandidato, an saro ginamit pa an oficina para padaculaon an saiyang imahe.
Diyan ninyo maheling kung sisay sa mg aini an nakasabot kan tunay na camogtacan kan Isla Maogma.
*****
Magayon na maging alerto sana an mga autoridad sa mga maabot na aldaw.
Baad igua naman diyan nin magdaogon na candidatong mapa-holdap kuno o caya mapa-ambush sa saiya man sanang sadiring tawohan, tanganing kahelakan kan mga votante.
Nangyari na ini kan 2022, sa Batalay. Daeng suspek, daeng nakaheling maliban sa mga victima daa, daeng kaso, daeng halaga….