Igua na naman palan na bag-ong proyecto na itao sa Isla Maogma an satong representante sa Congreso.
Kung kamo tabi nag-Alay Lakad kan Miercoles Santo papuntang Shrine of the Holy Cross sa Batalay, tibaad naaguihan niyo ini pero dae niyo sana nareparo ta dae kamo nagtingarog.
Kung marigmat an saendang mga mata, naheling niyo na an Great Wall of Batalay sa harong ni Cong Yoloyo igua nang concertina wire, sarong klase ning barbed wire. Imbes na matarom na puro nin pako an nasa wire, ini mga baging gilyit sa pang-ahit.
An concertina barbed wire pigagamit sa kudal nin mga base military, mga presohan asin iba pang mga pasilidad na dae dapat malaog nin mga daendatang tawo.
Dae pa man nin anuncio an mga nakaestar sa compound na ini, ta bako man sigurong pasiguro sa mga mahabas ba malaog pa sa harong tanganing kuahon panaltag siring kan 2022.
Puede man daa mangarquila nin submarine o bangka tanganing duman na sinda mag-agui sa dagat.
Caya an huringhuding sa Bato Alisto iyo na iturn-over in isa BJMP para gibohon na Bato District Jail, he! he! he!
Igua na pano daang San Andres District Jail y Virac District Jail, caya dapat igua man nin sadiring presohan na dakula an Bato Alisto, he! he! he!
Dae na pati caipuhan magpatogdok nin guardhouse ta igua na duman sa trangkahan nin duwang escalon na estaran nin guardia civil.
Kung ini daa mangyari, dakul daang mga PDL o Persons Deprived of Liberty an magustong ikulong sa bag-ong pasilidad sa Bato ta libre magkarigos sa dagat paminsan-minsan, he! he! he! Puede pa sinda makapamanwit nin toros o sandig pakatapos magduhay, he! he! he!
*****
Dae pa tapos an Cuaresma minsan pigselebrar na an Pagkabuhay nin Kagurangnan.
Ini bako sa Biblia kundi sa politika sa Isla Maogma.
Duman daa sa Gigmoto, nagpasaluib daa an alcalde sa cotana saiyang kaibahan sa linyada bago pa man nagibo nin katrayduran si Hudas Iscariote.
Segun sa mga chismosong taga-Sicmil, binayaan na daa kan mayor an saiyang bise mayor na harani sa Capitolyo asin duman na nag-iba sa candidatong bise na pinili kan Batalay House of Representatives.
Sinabihan na daa caini an enterong capitan del baryo na an ikampanya iyo an sadiring bise y si Cong Yoloyo. Ini mantang nakadukot pa daa ini sa magtugang na Cua sa ngonian.
An hapot kan mga disturbadong mga parasunod sa banwa kung ano daa an gigibohon kan congresista nin TGP na iyo an nagpa-atras sa cotana kalaban kan alcalde.
Bako sana ini an mangyayaring pagpasaluib sa maabot na mga semana.
An cadaclan na makurambiste adyan sa mga ward leader o paralista nin mga recipiente nin ayuda hari sa mga candidato.
Oras na ini makarecibe na nin pambubod y an saendang manok medyo delicado sa pusta, ciertong an cadaclan madalagan paluwas sa Isla Maogma o caya mahanap kan saendang Poncio Pilato, he! he! he!
*****
Kakasuhan daa kan mga organizer kan Aratubangan 2025 si Atorni Puting Buhok sa akusasyon caini na iguang ginibong daya sa debate kan nacaaguing semana diyan sa CatSU.
Maguriromdoman na nag-araso an dungo kan abogadong taga-Bato kan dae ini pigrecognizar kan emcee y pag-iriba bilang candidato para gobernadora.
Sinabi pa caini sa sarong entrevista sa radyo na baging natawan nin advance na kopya kan mga question an soboot duwang candidato, an joven pang bocal na gaambisyon maging congresista arog kan saiyang lolo y an dating presidente kan CatSU.
Dae man daang problema qui Pay Oliver kung siya kasuhan nin libel, ta siya daa makaso man sa mga organizer.