Grabe palan kagamohan kan sarong candidato kang magluwas sa socmed ang resulta kan sarong soboot internal survey nin kapareho niyang candidato sa Mayo dose.
Binasahan daa nin reglamento nin COMELEC na gabawal sa mga dae rehistradong mga survey asin an pagpaluwas caini na kulang an detalye.
Base sa nakaluwas na documento, lamitad an laban sa pagkagobernador pabor qui Bise Gob Bosste Cua, mantang gapaagawan sa kapurit an dating heneral y an retiradong abogado.
Sa karera papunta sa Gatasang Pambansa duman sa QC, nakaenot na daa nin diez kilometros an parabatlay na si Samuel sa gasunod na congresistang gatocaw. Pantolo an joven na bocal na an hagad sana sarong voto cada harong y an aqui kan dating gobernadora labing dos kilometros pa sana an binuag.
Sa bise gobernadora man, lamang sana daa nin diit an dating bise sa bocal na parakaon nin kinis.
Kung totoo an mga osipon na ini, bahala na an parabasal.
Kung COMELEC an tutubodan, dae ini mapasar ta kulang an detalye: daeng pangaran kan nag-survey, dae man an margin of error na inaapod y dae kinahang an porsiyento kan nakua nin lambang candidato sa kada municipio.
Dae ta ngani sigurado kung talagang tama an mga numero, lalo na sa bise gobernadora, na sa ngonian medyo dakula an lamang kan babaye sa lalaki.
*****
Saro man na intrigerong politico an naghinghing na nagpasurvey man an sarong grupo tanganing maheling kung inano an saendang partylist.
Segun sa chismosong ini, talaga daang baging masakit maderota sa pagkagobernador an taga-Calolbon kontra sa taga-Virac, taga-Pandan o taga-Bato. Halos doble daa an bilang kan mga gustong isurat an bossing sa balota.
Alagad sa pagka-congresista, halos tabla daa an laban kung gigibohon an eleksyon kan Febrero, mantang sa bise gobernador, doble an pabor sa nanartag nin toga kumpara sa dating alcalde.
Sa partylist, dae na man daang madaog sa partido nin mga Tau Gamma ta halos doble man an nakua caining resulta contra sa taga-ibong.
Kung mga municipio naman an paghoronan, halos tabla daa an hadi nin Bagamanoc y an dating bise gobernadora pero cierto na daang makaduwa si Toho.
Sa Baras, ta dae man nin kalaban si Mayor Paolo, dae man daang daogan an gatocaw na bise.
Minsan lamang si Juan sa bilang sa pinadalagan kan Batalay House of Representatives, tabla daa an tratamiento caini ta halangkaw an margin of error sa survey. Nangenotan man an dating jefe nin cuerpo de policia sa dating consejal na bitbit man kan gatocaw na congresista.
Sa Caramoran, bagui daang macagraduar an alcalde ta halangkaw an nakuang grado, lampas sa passing grade na 70 percent mantang bagsak an mga kalaban. Sa bise, si Timong soboot an puedeng gumana, basta dae manartag nin milyones an agom nin heneral, he! he! he!
Duman sa kahadean ni At-At, mahalat na sana siya kan talagang magana an taga-Sicmil na iyo daa paborito kan mga hinapot na votante.
Sa Pandan, halos tabla daa an gatocaw na alcalde sa dating alcaldeng abogadong hilaw pero an kalbong bise baging iyo an manartag nin shampoo paka-eleksyon, he! he! he!
Duman sa Payo, mahurat man si Mayor Etal kan resulta sa bise alagad harayo man daa an baya kan taga-simbahan qui Ogok, he! he! he!
Sa Calolbon, baguing daog an abogado sa padarakulan nin kliyenta sa parabolong. Naabyan man daa kan naka-wheelchair an gamaneho nin awto sa pagkabise.
Bentahe an aqui nin alcalde sa karera sa San Miguel y sa bise, natural lamang an iguang badil sa capitan na an dara lapis, he! he! he!
Ta sigurado nang bise nin Viga si Tarin, an kokoronahan na sana sa Hunyo iyo an presenteng bise.
Sa babayaan na puesto ni alcalde Samuel, magiging mahigpit an laban kan gobernador sa dating mayor, lalo na kung dae mag-atras an icatolong candidato. Sa bise mayor, caipuhan daang magpraktis pa an consejal kung dadaogon an alisto sa videoke, he! he! he!
Iyan an mga kona-kona….