Napano palan nin tawo ang gymnasium kan CatSU kan Ulat ni Cong Yoloyo.
Segun sa mga nakaheling, alas nueve nagpoon an seremonya asin enot na inapodan an mga inimbitaran na mga opisyales, minsan cadaclan na mga elegidong honorable dae man nag-aparecer.
Alagad, igua man nin nagcaperang mga candidato nasa alyansa ni Yoloyo, mga amo nin agencia de gobyerno, asin mga capitan del baryo na nakalista sa kudal kan congresista.
Sabi ngani kan mga nakadangog, kulang na sana daang sabitan nin medalya an mga in ikan mga organizer. Alagad kung medalya man sanang pang-graduation, mas pabor siempre an pampapataba nin pitaka, he! he! he!
Inabot daa nin duwang oras o higit pa an pataratara kan gatukaw na congresista, mantang an gatindog na congresista sige an maan.
Talaga daang mahalawig an ulat na inubos daa kasaro-saroa an mahigit sa dos bilyones pesos na mga proyectong inimplementar kan DPWH, pati na itong sa TGP partylist asin iba pa, ta an gabos daang ini, minsan fondo nin gobyerno nasyunal, puro saiya.
Aduman an mga river control, patinampong ampaw, seawall, multi-purpose building asin iba pa pero dae nadangog an fondo para sa pagpahingayad kan PAGASA Doppler radar station sa halagang P150 million man sana cotana.
Aduman man an soboot pinanaltag kan oficina niya (bako an DSWD?) na tabang sa mga nangangaipo arog kan AICS, TUPAD asin AKAP.
An dae natocar sa mensahe an simbag sa hapot kung ngata grabe an agrangay kan mga local na contratista asin mga hardware, pati na an mga trabahador ninda, na nawaran nin ganancia asin trabaho kan darhon an cadaclan na proyecto kan DPWH duman sa regional office.
Dae man sa report ni Cong Yoloyo an saendang pag-administrar kan DPWH District Engineering Office, na an oficina kan tunay na amo aduman sa Batalay: kung pila an pinalaog na caminerong politico, kung pila man an suwail na ingernierong tinangkas sa trabaho y kung pila an hinarian nin trabaho ta dae kursunada an pamandokon.
Kan natapos an orasyon nin Batalay House of Representatives, duman na naisihan na kulang palan daa an naihandang pangodtohan.
Kung kulang an pagcaon para sa tulak, mas lalong kulang daa an pagcaon para sa bolsa.
Sabi ngani nin sarong problemadong lider na nangimbitar nin mga Jovenes na pinangakuan, inabot daa nin pirang aldaw pakatapos kan ulat bago naitao an dos cientos pesos na paomok duman sa nagdayong mga aqui.
An saro ngani daang lider, napilitan na abonaran na sana an imong pigasingil ta barik-barik na an mga pinanugaan.
Nahulaan na siguro kan cadaclan na nag-atender na makulang an handa pati an balonon.
Caya kulang man daa an palakpak sa recitation kan congresista na caipuhan pa daang makimaherak sa gadangog na magpalakpak man sinda, he! he! he!
Cotana, nagpundar an mga congresista nin Batalay nin grupo na an trabaho mapalakpak sana sa cada sinyas ni Yoloyo, alagad dae siguro inabot nin kaisipan, he! he! he!
*****
Nagpaluwas na an COMELEC nin lista nin mga puedeng gibohon na basaran nin kasong vote-buying y vote-selling. Saro-saroon ta an mga ini.
Enot, kung ika daa iguang bitbit o nanaltag nin sinsilyo, papel na imo, card, envelope na iguang laog, mga bag, groceria, token na puedeng ipanukal nin imo o anuman na bagay na iguang halaga, kaiba an sample ballot o iba pang material sa campanya nin candidato, puede ka daang kasuhan.
Tandaanan tabi an mga tataramon na “bagay na iguang halaga” ta an sisay man na candidatong mataltag nin bagay na daeng halaga, ciertong tuwad pag-abot nin Mayo dose, he! he! he!
Ipadagos ta ini….