Tres cientos na an presyo nin marinas na klaseng karneng orig sa saod nin Virac.
Igua pa man nin nabakal na mas hababa, pero mahibog na an taba y posibleng an iba hari sa tangkal na afectado nin ASF, caya barato man an bakal.
Segun sa mga parabuno y paratinda nin karne, maubos na orig na bunoon sa Isla Maogma.
Kung harimbawa talagang dae nang makuang bunoon, caipuhan nang mag-import nin orig sa ibong. Lalo pang mahalangkaw an presyo, ta an mga buhay na orig isakay pa sa lantsa dangan babahogon ngona kan capitalista hanggan sa aldaw na kaipuhan nang magbuno.
Kang nacaaguing semana ngani, pighalangkawan na daa kan mayor na supplier nin manok an presyo cada kilo. Sa laog daa nin apat na aldaw, nagtaas an presyo caini nin cinco pesos cada kilo oro-aldaw.
Kung sige an price increase, posibleng mag-abot sa dos cientos pesos cada kilo an maldos o lampas pa.
Dapat paghoronan na kan task force kung ano an mga posibleng gibohon, lalo na sa presyo nin mga alternatibong karne arog nin manok. Natural, mga tugang, dae kabali dindi an hilaw na carne diyan sa Calle Mabole ta dae puedeng caonon, dilamon puede, he! he! he!
*****
Kakasuhan palan daa an district engineer nin DPWH y iba pang opisyal dahil sa salang procidimiento sa pag-award nin contrata.
Segun sa mga chismoso, pinasyaran na daa nin abogado de campanilla an magcapirang opisyal sa San Isidro Village para magkua nin papeles y hapoton an mga sa nangyari.
Maguiromdoman na kan nacaaguing taon, sarong local na contratista an nagsumitir kan pinakahababang bid sa apat na proyecto alagad na-disqualify ini. Kan maconsiderar an disqualification, dae dagos pinaluwas kan BAC an Notice of Award sa contratista na kalaban kan tunay na amo nin DPWH.
Imbes, sinakat an isyu qui DE Arias na sagcod sa ngonian dae pang desisyon minsan lampas na sa talaan na oras base sa Republic Act 9184.
An rason daa ihapot pa sa Legal Division kan DPWH regional office, alagad an suspetsa kan cadaclan duman dinara sa oficina kan gatindog na congresista sa Batalay House of Representatives, he! he! he!
Maubos an buhok caining taga-ibong na DE sa kaatubang kan mga problema sa DPWH. Dae man siyang maginibo ta siya an nacatocaw y dae pa man pigasipa paibong.
*****
Sa limang natadang candidato para congresista sa Mayo dose, si Eugenio Salimao Jr. an pinakagurang sa edad na 73. Bako man ining problema ta nanggana nganing presidente nin Estados Unidos si Donald Trump sa edad na 78.
Segun sa mga Intsik na eksperto sa feng shui, dacul daang oportunidad na maabot sa mga Rabbit, an birth sign ni Mr. Salimao sa Chinese calendar.
Sa Year of the Snake, paborable daa an Marso asin Abril sa saendang career. Ta retirado na siya sa pagka-technician nin eroplano y dae man nin eroplano sa Pajo, siguradong sa politica an sinasabi kan mga parahula.
An mga kuneho daa, kabali siyempre an candidato, makaresibe nin dagdag na income lalo na daa sa katapusan nin Abril, kung saen hari dae man sinabi sa horoscope, he! he! he!
Si Cong Yoloyo palan inotnga kan saiyang ina kan Mayo 10, 1959 bako man sa Bato kundi duman sa Maripipi, Biliran.
Ini siguro an dahelan kung ngata grabe an bantay caini masqui saen magpunta, he! he! he!
Sa Year of the Pig minundag an satong congresista, na segun sa horoscope nin mga Intsik magkakaigua nin pagkakataon na hanapon an sadiri asin kung ano tunay na makapaogma saiya.
Sa 2025 niya daa mahihiling an saiyang dalan sa future y kung igua daang mga bulan na bakong maogma, bago daa matapos an taon malakaw siya sa biyahe nin spiritual exploration. Kung siya malaog sa seminary o mabali sa mga monghe, dae sinabi sa horoscope.
An cierto daa, minsan grabe daa an hahagadon kan 2025, igua financial reward na maabot. Kung ano an mga ini, dae man sinabi, he! he! he!