Habang grabe an kagamohan kan mga saiyang mga kahimanwa sa uran asin baha na dara ni Kristine kan fecha 22 nin Oktubre, aduman palan an satong gatindog na congresista sa oficina ni DPWH Secretary Manuel Bonoan para hagadon an pagpalayas qui Assistant DE Maximo Elida sa DPWH Catanduanes Engineering District.
Pakatapos daa ngani kan bagyo, nakimiting pa man an gatokaw na congresista duman sa DPWH sa kahadean ni Capitan Miguel para mag-olay kasi DE San Simon y saro pang disipulo, alagad dae na inimbitaran si ADE Elida ta isi na ni Cong Yoloyo na hinari na ini sa puesto, he! he! he!
Saro pa, igua man nin darang ventaje an bagyo, lalo na an PAGASA, ta bilog na semana, nagtener sa oficina si DE San Simon imbes na maglayas pa-ibong na dae pa ngani gainit an lubot sa tocawan sa district.
Napaboran man daa caini si Cong Yoloyo, na golpe an iliod duman sa baylehan habang kaado an sarong maestra. Daog pa daa an agogo dancer sa may underpass nin Recto kung gagiling an politico, baad gasamantala habang wara an guardia civil, he! he! he!
*****
Grabe an tinios kan satong mga kahimanwa na na-stranded sa pier kan Tabaco kan nacaaguing semana.
Halos sais cientos na pasahero an nagsurusuan duman matapos na makansela an mga biyahe nin barko dahil sa amay na pagdeclara nin senyal numero uno kan bagyo.
Mayad ngani na igua lamang nin pagkaon tolong vez cada aldaw na tao kan gobyerno provincial.
Naghengoha man an ciudad nin Tabaco na maibaryo sa mas marinas na lugar an mga goslab, mga bados, iguang mga bitbit na aqui, asin an mga irido duman sa Tabaco National High School.
An natada sa uruyag pang terminal iyo an mga joven pa pati itong makatios maghigda sa tocawan o caya sa carton na nakalatag sa baldosa.
An hapot ngonian: natocar daw lamang ni Cong Yoloyo an isyu kan dae napahingayad na terminal duman sa budget hearing kan PPA sa Congreso? O hanggan sana siya sa pagsuspinde kan singil na treinta y cinco pesos cada pasahero para sa terminal fee?
Cotana huruhalabaan man kan satong representante an saiyang pag-isip, bako sanang sa mejoras na makukua sa labing dos bilyones na fondo kan DPWH sa mga proyectong an makinabang man sana iyo an mga contratistang taga-ibong, pwe!
*****.
Aduman na sinabod sa DPWH regional office si dating Assistant DE Maximo Eleda.
Kung saen siyang oficina matugpo, bahala na si Director Virgilio Eduarte na saro man na parasunod kan satong gatindog na congresista.
Magpoon kan magtocaw an elegidong representante nin Isla Maogma, anom nang halangkaw na opisyal kan DPWH Catanduanes an sinipa kan mga poderosong politico.
Sinda ngonian gaoromon-omon duman sa saday na cuarto sa regional office, kulang an gibo minsan halangkaw an sueldo, ta habo man tawan nin magcacanigong responsibilidad kan mga amo.
An kasal-an man sana ninda, habo nindang tubodon an orden kan duwang congresista na itao an mga proyecto sa mga gusto nindang contratista masque an mga ini daog sa bidding.
Ta habo man magpakulong an mga veteranong ingeniero, dae na baleng iapyat sa ibong basta daeng kaso.
Herac man na mga servicio civil ini….
*****
Ngonian na Defuntorum, inaapodan an mga declaradong candidato na dae na maglabay-labay sa mga camposanto ta macaolang kamo sa agihan.
Imbes, puntahan an pantiyon kan saendang mga gadan na mahal sa buhay asin maghagad nin tabang sa saendang calag, magsolsol, magngayongayo asin mamibi….