Awat nang hababa nin diit an presyo nin krudo, gasolina y gas diyan sa Silangan kumpara sa mga istasyon nin Powerzone, dae sana daa piga-bandilyo sa karatula.
Ini man an panlaban ninda sa discount kan kakumpitensya, bago pa man magpara-post an mga netizens kan mga litrato nin presyo nin gasolina y krudo sa ibong na mas hababa nin lampas veinte pesos kaysa sa Islang Maogma.
Duman sa Pandan y Caramoran, dati nang hababa nin mahigit diyes pesos an cada litro, ta baguing binakalan man sa ibong an produkto.
Magpoon pa kan pinasar an Downstream Oil Industry Deregulation Act of 1998, pinabayaan na kan gobyerno an pagpabakal nin gasolina y krudo sa mga dealer sa baba.
An gustong sabihon, bahala na sinda kung magkahang kung anong presyo kan mga ini, dae nang pakialam an gobyerno.
Caya ngani kan maglaog an Silangan, an hona-hona kan cadaclan mababa nin duro-dacula an pump price. Iyo man daa, pero dae nag-awat, paka pirang bulan, pareho na an presyo sa Powerzone.
Alagad, rekisitos man kan Department of Energy (DOE) na an cada dealer o istasyon magsumitir nin eksaktong cuentada kan presyo nin gasolina, krudo o LGP.
Kung an reglamentong ini nasunod magpoon pa caidto, an DOE sana an makasimbag.
Caya kung mapamiting an mga honorableng miembros nin junta provincial, paapodon bako sana an representantes kan duwang istasyon asin mga distributor nin LPG, kundi an mga opisyales kan Oil Industry Management Bureau (OIMB.
Sinda sana an makasimbag kung an pigabayadan kan mga drayber nin demotor na carruaje o kabayo sa cada litro tama y bakong overpriced.
An hapot, harimbawang mapatunayan na sobra an singil sa cada litro kan mga istasyon y parapabakal nin LPG, puede daw singilon nin publico (bako sana an mga nahubon ni Nestor) an mga ini nin refund, siring sa ginigibo kan Energy Regulatory Commission (ERC) sa mga sobrang singil sa corriente?
*****
Saro daa sa mga rason kung ngata dae pigapatukaw an University Student Council (USC) president Virgilio Cortado Jr, sa ngonian iyo na caipuhan sigurohon an voto kan mga miembros nin Board of Regents (BOR) para sa magiging OIC kan CatSU oras na magdimitir an presidente.
Sa otro Lunes, puede na magsumitir nin Certificate of Candidacy (CoC) an mga nacatocaw na mga elegidong opisyal pati na an mga gaambisyon na tukalan sinda, caibahan na an presidente nin Cesar State University.
Entonces, oras na mag-file na ini nin CoC, considerado nang resigned ini magpoon kan office hours kan aldaw na an.
Pirang bulan na an nacaagui, igua nang nadadangog na mga huringhuding na possible daang pillion na maging OIC, habang dae pa nin desisyon an BOR, iyo an kaubay-ubay kan namamayo.
An grupo man daa kan mga sungaw na balbula, an saendang tawo man an ikahang sa puesto, tanganing makatabang sa campanya political, kung bako sa mahilig sa paanos, duman sa gatocaw na alisto, he! he! he!
Caya dae pa ngani campanya para sa May 2025 national and local elections, magabirilangan nan in voto diyan sa BOR, he! he! he!
Natural an inombraran kan mapaaram na presidente iyo an makatabang saiya, an gigibohon man kan ibang lado iba an ikahang.
Segun sa ley, iguang anom na bulan an BOR para magpili nin OIC habang dae pa nakapili nin presidente.
Alagad, baguing mapilitan an BOR na gibohon ini sa lalong madaring panahon, tanganing dae magamit sa maating politica an fondo asin tawo nin CatSU.
Iyan an enot na sultada sa pirang bulan na derby na matapos sa 2025.