Nagrally palan sa tinampo sa gilid kan CatSU kang Lunes.
Bako ogaring na mga estudyante kundi an grupo ning UGM tricycle drivers and operators na nagprotesta laban sa pagpabor sa kalaban nindang grupo na STACAP TODA na tinawan nin permiso kan halangkaw na opisyal na magkaigua nin paradahan diyan sa pinakamatawong trangkahan kan unibersidad.
Awat nang isyu ini, igua na ngani sigurong reclamong pinaabot sa Ombudsman an presidente kan UGM.
Ngonian, bako man bawal na magprotesta, ni dae ngani caipuhan nin permiso hari sa alcalde kan LGU. An importante, magpaisi tanganing mapasabot kung sain gigibohon an rali y ano an dapat gibohon kan mga raliyista tanganing mamantenir an agui kan mga vehiculo asin tawo.
Dae man ngani nagdurar nin pirang oras an protesta, basta mapaabot sana kan grupo an saendang namatean. Gapasungaw man sana nin init an mga ini.
Sa laog kan campus, dae pa man nin naheling na gakalakaga, puro pa nalukdoan an mga caldero.
An cadaclan gahalat kan filing nin CoC kan mga pinangaturogan na maging politico sa Isla Maogma.
Kung sabagay, sarong bulan y sarong semana na sana, puede na sinda magselebra, he! he! he!
*****
Nagreclamo palan daa an gatocaw na congresista qui House Speaker Martin Romualdez kung ngata pinasumpa bilang miembro nin Lakas an mga kalaban niya sa politica.
Dae man maginibo si Cong Yoloyo y an gatindog na congresista ta an hanap man kan pinakadakulang trompa sa Batasang Pambansa iyo an may pinakadakul na kaalyado sa probinsiya.
Dae man nin ika-presentar na mga kairibang bocal o alcalde an Batalay House of Representatives, nadarhan pa ngani nin sarong alcalde.
Kung iisipon, dae man caipuhan ni Cong Yoloyo y pag-iriba an kaalyado, ta kaya man daa nindang solohan an panaltag sa maabot na eleksyon y sobra-sobra na an fondong nakatagama.
Mas lalong bako man na katutubod an mga pa-survey.
An tunay na survey nangyayari pirang aldaw bago magborotohan.
Mas epektibo y sigurado an survey na ini minsan bakong mga taga-Pulse Asia o SWS an gaconducta kan survey.
An importante, mga ward leader nin politico an ga-survey sa cada harong sa barangay y saro sana an hapot: mapalista ka o dae?
Iyan an tunay na survey sa eleksyon, igua pang gratipikasyon, he! he! he!
*****
Igua na palan nin katukal an COVID-19.
Nag-anuncio na an DOH na dati nang uya an Mpox, o monkeypox, ta igua nang naenot na siyam na kaso kan sarong taon pa.
An pangsampulo daa treinta y tres anos na laraking dae man nag-abroad pero nakiubayan tolong semana bago kalenturahon.
Pakaapat na aldaw, igua nang mga pantal o namulang panit sa pandoc, rikod, buong, ginhawa, sa may ikinabuhay pati na sa palad buda raparapa.
Nakamati pa daa ini ning kulog nin payo asin ginhawa, pagluya nin buhay, asin mga namagang kulani.
Pariwanag kan DOH, maolakitan ka sana nin Mpoc sa paagui ning pakiubayan sa mga igua nang virus, sa paggamit nin bado o gamit na contaminado, o sa mga hayop na igua man nin Mpox.
Caya daa caipuhan maghugad pirmi gamit an sabon asin tubig. Alagad kung nakitukal na ning riwoy o venino, dae na madara nin panghugas minsan sarong trak pang tubig y duwang sakong sabon an gamiton.
Dae man sinabi kan DOH kung saen nangyari an mga naenot na kaso basta an ika-sampulo sa Maynilang kayganda.
Caya an mga viajero na pirming gapa-Manila dae ngona magtais kan saendang tabak o magbahog nin tigre ta delicado.
Tibaad maolakitan mo pa an saimong familia o mga amigo oras na magluwas an mga kagid. Ta aabotan daa nin duwa hanggan apat na semana bago mahari an mga kagan, magpasiguro nan in cuartang kunsumo para sa sarong bulan.
Dae puede magluwas ta tibaad magkulog an saimong boot. Baad dulagan ka nin tawo siring sa kagidon na ayam…