Talagang harani na an eleksyon.
Sinipa na palan kan presidente nin CatSU ang awat nang dean kan College of Engineering.
An dahilan daa ta sige an pakiinom nin salabat qui alcalde Samuel Laynes, minsan dekada na niya ining pigagibo dae pa man nakaisip an sainyang amo na maging amo sa Isla Maogma.
Inosip daa pano ini kan sarong laos na disco dancer sa defuntong Chicken House.
Saro pa, sa pagheling kan mga hadi sa CatSU, cadaclan kan mga estudyante sa College of Engineering mga suwail y miembros kan grupo nin Magdalo.
Posibleng an paghiwas na ini sa veteranong propesor igua koneksyon sa plano kan mga political adviser kan Kahuruhalangkawi sa Isla Maogma na ipaapod an gabos na estudyante, kaiba an saendang mga magurang, sa orientation na gigibohon pagpoon kan klase.
Ini soboot para ibalangibog an mga naginibohan kan presenteng administrasyon, lalo na sa WURI ranking, mga edificiong an dating presidente an nagpundar, mga dati nang bakanteng posisyon na pinanoan nin soboot puro numero unong qualificado, y pati na siempre kung ngata dae pa namundag an KIST Park y Economic Zone, pati na kung ngata dae nahaman an edificiong pinun-an kan DPWH diyan sa dating uma kan unibersidad.
Caya pinapatanidan na an mga estudyante na sabihan an saendang mga magurang na magtagama nin dagdag na pamasahe pati para sa pagkaon ta tibaad abotan nin hapon an pataratara kan Kahuruhalangkawi, he! he! he!
Ini dagdag pa sa gagastoson kan mga magurang para sa drug testing na hagad kan escuelahan sa gabos na malaog.
Dae man daa kaya puedeng ilibre ini sa irarom kan AICS o sa PhilHealth, masque na sa Malasakit.
Kan nacaaguing taon, naamotan si Cong Bong Teves ta pig-anuncio na kan administrasyon na libre ining itatao kan TGP y CDHI.
Inda daw ngonian kung saguton pa otro kan congresista hare mismo sa saiyang bulsa.
Igua nganing gahapot na ciudadanong maguinilomdom kung ngata pigapasunod pa an rekisitos na ining drug test kung an cadaclan kan onceng municipio sa Isla Maogma declarado nang drug-cleared kan PDEA magpoon pa kan Febrero ngonian na taon.
Maguilomdoman na tinawan mismo nin sertipiko an mga alcalde nin Baras, Bagamanoc, Bato, Panganiban, Pandan, San Andres, San Miguel, y Viga dahil caini.
An Caramoran y Gigmoto harani na man ideclarang drug-cleared ta rerekisahon na sana kan inter-agency committee an saendang isinumitir na papeles.
Segun pa sa PDEA, tres cientos nueveng barangay na an consideradong drug-cleared y an natatadang anom na barangay na dae pa anas na nasa Virac.
*****
Ma viaje palan an mga capitan del barrio sa mga maabot na bulan
Segun sa anuncio kan DILG, matiripon daa an mga miembros kan mga Liga ng mga Barangay para sa saendang national congress na gigibohon by cluster magpoon Agosto hanggan Noviembre.
An mga capitan titiponon by cluster, y an primerong cluster maatender sa saendang congress sa maabot na Agosto dose hanggan katorse duman sa World Trade Center sa Pasay City.
Kung kaiba na an mga taga-Isla Maogma sa primerong batch, dae pang anuncio.
Kung harimbawang sa masunod pang bulan na Septiembre, pabor sa mga politico sa Isla Maogma.
Igua pa sindang panahon magdisponer nin dagdag na balon, pang-inom, pangsugal, pang-ubay y pambakal nin pasalubong para sa saendang mga ataman na capitan, he! he! he!
Hababa na dindi an dos mil pesos, ta mahal na an hilaw na carne, mahal pa an pagpamasahe, he! he! he!