Bakong kananari kung maisihan nin mga votante an daeng amor an icaduwang congresista kan Isla Maogma sa primero asin icatolong congressman.
Sa cada visita caini sa mga barangay y municipio, urit-urit daang pigataram ni Cong Yoloyo na saro sana an congresista nin distrito nin Catanduanes, na iyo man talaga an totoo.
Dae man nin maginibo si Cong Bong kung iyo ini an campanya kan Batalay House of Representatives sa ngonian.
Alagad an bako man na totoo sa pananaramon kan enot na congresista na an gabos daang proyecto y programa sa Catanduanes kan DPWH y iba pang agencia de gobyerno puro saiya.
An gustong sabihon kan taga-Batalay, minsan pa proyecto y programa kan TGP Partylist, na sakop an Isla Maogma, saiya pa, he! he! he!
Entonces, an credito caini, pati na an deligencia posible, dapat daa aduman man madalagan sa caban kan Batalay House of Representatives, he! he! he!
Iyo ini an rason kung ngata sa ngonian, dae nang galaog na proyecto na pinundohan kan ibang senador o partylist, ta pigasingil nin parking fee, he! he! he!
Iyo man ini an rason kung ngata sagcod sa ngonian, cadaclan kan mga proyecto kan DPWH Catanduanes aduman sa regional office o sa Maynilang kayganda pigapa-bidding, tanganing makalaog sa agahid nin mga taga-Batalay, he! he! he!
Kung noarin man mangalab-ngalab an campo ni Cong Bong manongod sa bagay na ini, halat-halaton ta na sana ta harani na an pagsumitir nin CoC para sa eleksyon sa Mayo 2025, siguradon mapoon na pagkalakaga an caldero nin politica sa Isla Maogma.
*****
Bako sana palan na diploma an naresibe kan mga naggraduar na mga Masteral y Doctoral na estudiantes sa CatSU kan nacaaguing semana.
Ta inabot nin sobrang sarong oras an pataratara kan huespe de honor na haring Taiwan, magcacaigua pa daa sinda nin sertipiko sa pag-atender sa saiyang seminar lecture sa Artificial Intelligence.
Ini tanganing mataohan man nin magcacanigong balos an saendang pagdangog sa bagay na dae daa nasabotan kan cadaclan, he! he! he!
Tama si Papa Francisco na dapat limitaran an mga homilia sa Misa sa ocho minutos sana tanganing dae mangaturog an mga tawo sa paghorop-horop sa tataramon kan padi.
Cotana, ipasunod man an bagay na ini sa mga funcion, pasumpa sa PTA o barangay tanod, kasal, asin iba pang seremonya.
Sa Isla Maogma, an enot na afectado iyo an primerong congresista, ta an saiyang pagbasa nin listahan kan soboot man proyecto niya, minsan pinundohan nin gobyerno, gaabot nin lampas cabangang oras.
Puede nganing gibohon ining reglamento kan Comelec sa pagtaram-taram kan mga candidato y mga miembros kan speakers bureau sa entablado sa panahon nin campanya.
Alagad tibaad kulangon nin panahon an mga candidato y alipores sa pagtabuga sa mga kalaban, lalo na kung grabe an ginibong kamarang-marangan.
*****
Igua na naman palan nin milagrong nangyari sa DPWH.
Kan ultimong pa-bidding kan sarong proyecto kan TGP para sa banwaan nin Baras, an nanggana daa bako an lowest kundi an highest bidder. Duman man daa sa sarong proyecto, an nanggana an lowest bidder alagad dapat daa disqualified na ini sa pagrekisa pa sana kan mga papeles.
Kung pan-o ini nangyari, an BAC, TWG y si DE Arias sana an makasimbag.
Segun sa mga sehongan sa DPWH, tibaad daa kabalang y parabontit an nasa rikod kan milagrong ini ta daing naguinibo an santo sa SIV na kontrahon ini.
Caya daa kung madagos an mga patrabaho sa Baras, bako sanang babantayan an mga contratista kundi painvestigaran sa Kongreso an mga taga-DPWH.