Siyam na aldaw na sana, dae pa gabotwa ang pighulaan kang PAGASA na duwang bagyo ngonian na Mayo.
Sabi kang mga parapoon, magayon na magpamibi na an mga tawo, lalo na si manedyer Abuab kang VIWAD asin pag-iriba, asin maghagad nin uran, dacul na uran, sa satong Kagurangnan.
Segun ki GM, diit na sana an gaburos na tubig sa tolong source kan water district sa Cawayan, Sibanhan y Padurog.
Un piye na sana siguro kababa kan tubig sa tangke nin Cawayan, iyo man an sitwasyon sa Sibanhan.
Caya kung bako man na mga buta an mga consumidor kan VIWAD, mareparo na nindang dae na gabuswak an tubig sa gripo, bagi na sanang ihi nin orig.
Orawang adyan pa man si Monsenyor Manolo, hagadon ta an saiyang tabang na ibali sa lambang Misa an Oratio Imperata tanganing mag-uran nan in huro-halawig.
Puede man na bagyo an hagadon, basta pambatag sana.
Habang bako pang kadurom an Silangan, magluway-luway na kita sa paggamit nin tubig.
Dae na ngona mag-car wash gamit an hose o masque pa sa balde, ta magastos ini sa tubig. Puede nang trapo ngona an ipahid, an importante malinig an laog.
Guilomdomon tabi na caya ngani gasakay ka sa awto, para dae ka mainitan, matap-ogan o malabo nin uran. An modernong carruaje dinisenyo para dindi, caya masque dae mo pag hugasan sa laog nin duwang semana, bakong problema.
Sabi kan VIWAD, dae ngona mag-shower, tabo asin balde an gamiton ta mas tipid. Kung harani an harong niyo sa dagat o sa salog, maglab-og na basta sigurohon na dae kang nadut-an na galataw-lataw na duhay, he! he! he!
Kung talagang til-is na sana nin ilig nin posit, punas-punas na lang nin labacara, dacul-daculon sana an wisik nin pahamot para dae halata.
Kung mainom nin alak, dae ngona mag-Ginebra o Black Label kundi itong mga agua de pataranta na dae caipuhan an chaser.
An gabos na mga medyos na ini bilang preparasyon sa maabot na mas lalong mainit na panahon na dara kan climate change.
Tibaad lamang dae ta na abuton an nangyari duman sa Arrakis, sa pelikulang Dune, kung saen an mga natigbak, pigakua an dugo para magibong tubig.
Habang dae pa man ini, maghagad ngona kita nin tabang sa itaas…
*****
Sa masunod na duwang aldaw, kapiyestahan kan Nuestra Señora de Salvacion diyan sa duwang Palta s Virac.
Inaapodan an mga autoridad na magbantay ta tibaad igua naman nin masobrahan nin inom, siguradong boyong man an motor na sasakyan pagparibod.
Dae na paghalaton na iguang mangyaring madugong aksidente diyan sa mayang na tinampo pababa sa Santo Domingo o papunta duman sa Palawig.
Kariog an presyo nin bakal na pangsugpon sa bararing kamot o bitis, aabton nin sanggatos hasta tres cientos mil pesos an bayadan sa doktor nin tol-ang. Kung ano an presyo kan bakal na ikahang, iyo man an singil, dae pa kabali an bayad sa bolong.
Alagad kung dae ka talagang pagpahalaga sa saimong buhay basta sana makadakul nin alak y pulutan, dae na balang makadamay an iba, magbakal na sana tabi nin tolong metrong pisi sa hardware asin maghanap nin huruhalangkaw na kahoy. Batid na kamo kaini ta baguing iyo an nauso sa Virac.
*****
Igua palan daang macandidatong retiradong heneral.
Gobernador daa an dadalaganan ni dating Major General Macairog Alberto, na an magurang tubong Pandan pero duman na sa Maynilang kayganda nagpadakula nin mga aqui.
Kung magbitbit ini nin jamon de pata, magayon na helingon: halangkaw na ex-general, hababang ex-president, he! he! he!