Grabe na naman an huringhuding na nagluwas kan mabaretang nagbaryo na nin rehistro bilang votante an mga aqui ni Gob Boboy Cua na sinda Jeric y Joseph Jr.
Tibaad daa an saro sa mga ini maentra na sa politica bilang preparasyon sa maabot na panahon kung magretiro na an saendang ama.
Ini saro talagang posibilidad, lalo na kung an sarong familia nakagamot na sa local na politica siring kan mga Alberto kan panahon y an mga Villafuerte sa Camarines Sur, Escudero sa Sorsogon, Kho sa Masbate, Padilla sa Camarines Norte y an mga Co sa Albay.
Alagad sa ngonian, segun sa mga nacaisi, dae pa cierto kung sisay, noarin o saen macandidato an sisay man saenda, sa familia man kan gobernador o bise gobernador.
Saro pa, bako man sana daang an duwang aqui an mabaryo kan rehistro kundi an saendang ina pati iba pang miyembros nin familia.
Ini daa para tuwangan an gobernador sa pagcandidato bilang alcalde nin Virac, an puestong ciertong babayaan ni Sammy Laynes oras na ini manggana bilang congresista nin Isla Maogma.
*****
Dae man puedeng bawalan an mga aqui nin mga presente o dating politico na magcandidato lalo na kung nasa dugo ninda an magdalagan.
Sa mga Alberto, duwa pa an natada, parehong bocal. An saro caini, si PBM Jan Ferdinand Alberto, dae pa gapahayag kung macandidato otro bilang miembro nin junta provincial, mahanap nin ibang klaseng trabaho, o madalagan sa ibang puesto sa ehekutibo.
Posible pa ngani ining magdalagan bilang bise alcalde, lalo na ta free-for-all an laban sa 2025 sa paggraduar ni Bise Mayor Arlynn Arcilla.
Puede man ining magin alcalde, lalo na ta pareho nang kinaptan an puesto kan saiyang mga magurang, si Cito y Flerida.
*****
Si Cong Yoloyo ngani daa, an plano kan familia padalaganon an agom sa pagca-alcalde nin Calolbon ta duman ini namundag, y an aqui man sa Bato kalaban si alcalde Juan Rodulfo.
Segun sa osipon kan campo kan Batalay House of Representatives, tres cientos milyones pesos daa an nakahandang fondo para sa sarabay na tolong campanyang ini.
Kung babarangaon nin mga tahodan sa politica, posibleng cincuenta milyones pesos sa Bato, cincuenta man sa Calolbon, y dos cientos milyones pesos para sa mga mavoto otro sa primerong congresista nin Batalay.
Caya daa tibaad abuton nin dos mil cada votante an ipanaltag can familia oras na madagos an plano ninda sa otro taon.
Iyan kung susubadon an saendang paon…
*****
Saro sana palan an opisyal sa DPWH Catanduanes Engineering District na sinipa ni OIC-DE Cagomoc.
Tolong semana nang pigabantayan an soboot plano kan tunay na DE kan oficina na harion sa puesto an tolong opisyal ta dae daa garespeto sa gatocaw na congressman.
Nadagos daa pero saro sana an nalasayan, an amo man maintenance section na sinipa sa oficina kan assistant DE kung saen duman siya maparipot maghapon.
An duwa pang titingkalon cotana nakarikay daa ta nagrespeto na sa duwang congresista, lalo na sa pagselebar kan compleanyo kan gatocaw na congressman, he! he! he!
Dae man sinabi kung nagregalo nin litson o birthday cake o nadara sana sa abrasa o presencia, he! he! he!
Bako man na kasal-an an magrespeto sa mga hade-hade lalo na kung nakataya an saimong hanapbuhay.
Alagad igua man ining tig-an, iguang panahon kung saen an naamohan makataram na nin tama na, sobra na.
Kung saarin ini mangyayari diyan sa DPWH, dae ta pa isi. Tibaad pagpoon na nin campanya sa otro taon, lalo na kung igua nang rinaw an sentensiya kan constituentes.
*****
Igua palan daang nagwala diyan sa magayon na edificio kan DPWH kan nacaaguing semana.
Saro daang empleyado an nagrebenta kan maisihan na ipinangosip kan tawo nin gatindog na congresista na siya daa gasingil nin porciento sa mga contratista.
Sinulongan daa an paraosip ni Madam DE y kinarigos ini nin panghimag. Bako man daang totoo an huringhuding ta an pigasingil daang ini para sa oficina y igua nganing resibo.
Ini an masakit sa mga Marites, lalo na kung talagang bobowa an tsismis, malanit an baros kan mga afectado.
Dae daa natakot an empleyadong nagwala, masque pa daa osipon siya sa gatindog na congresista.
Mayad pa ini ta iguang kusog nin boot, bakong arog kan mga halangkaw na amo na kapot sa riog kan tunay na DE…