Mayaman palan an mga taga-Isla Maogma.
Iyan an sabi kan mga taga-Napocor sa saendang palabas kan nacaaguing Huwebes duman sa Dificelco sa public hearing kan ERC manongod sa dagdag singil sa presyo nin corriente.
Segun sa NPC, an average household sa Catanduanes igua daang gananciang halos tres cientos mil cada taon y an natago daang cuarta maabot man sa sitenta y uno mil pesos cada taon.
Ini siguro an rason kung ngata cariog man an presyo nin sila buda carne sa saod nin Virac, ta mayaman an mga parabakal, he! he! he!
Mahapot an mga pobreng familia, haen daw an sitenta y uno mil pesos na an…
Ini man an masakit kung hihilingon mo sana an numero kan statistics.
Segun sa PSA, catorce porsiyento kan mga familia sa Isla Maogma an pobre.
Entonces, kung babasehan mo an sisenta mil na household sa enterong Catanduanes, halos nueve mil caini an pobre o kulang an hanapbuhay para mataparan an gastos sa basic needs.
Dae man nabibilang kung pirang familia man an iguang hanapbuhay pero tama sana o iguang sobrang diit para sa saendang oroaldaw na panggastos.
Pero ciertong an cadaclan kan tagong yaman kan Isla Maogma aduman sa mga magcapirang negociante, mga iguang marinas na puesto sa gobyerno, mga ingeniero sa DPWH, PEO y DepEd, pati na mga piling politicong nacatocaw sa caban nin banwaan.**
Ta baguing dae man mapugulan an plano kan gobyerno na taasan an singil sa corriente, magayon na magpreparar oras na mag-abot ini.
Magpoon na sa pagtipid sa kunsumo. Magbakal na nin mga solar light, aga sana paandaron an repridyeretor, dae na maggamit nin aircon y bawasan an paghiling nin TV.
Maglatag nin kutson sa terasa, babawan nin banig, kanghan nin muskitero asin maghigda mga alas nueve na kung igua nang hayahay hari sa Silangan.
*****
Mahigos palan an mga ingeniero kan DPWH sa pag-inspekyon nin mga tinampo kung kaipuhan nang bakbakon.
Ini an nagluwas sa sesyon kan junta provincial kan nacaagui pang semana kan sitaron kan mga honorableng contractor (bako gabos) an mga amo-amo sa DPWH na naamohan man na duwang tunay na amo.
Pigasumitir daa ninda an report nin inspeksyon kan mga gabakbak na tinampong kongkreto, mga gabaratak y mga ampaw na baldosa, tanganing bahala na man an central office mag-prioritize kung arin an popondohan.
Ini an problema ngonian sa DPWH ta mahigos sana mag-inspeksyon kung sasalidahan na an uruyag na tinampo.
Alagad kung pigatrabahuhan pa sana an ampaw na tinampo, aaguihan sana an proyecto, riritratohon an semento y pipirmahan an certificate of completion depende kung iguang pahanglas, he! he! he!
Dae sindang pakialam kung inano an halo kan kongkreto o madugi an baybay y graba, basta an cuentada dae mahiwas.
Dapat siguro mag-organizar nin sarong NGO, sabihon tang Bantay Ampaw, tanganing minsan dae mo bantayan an paghalo (lalo na kung an halo hari sa batching plant), basta oras na nagbakbak ini o nagbatak sa laog nin sarong taon, otomatikong kakasuhan an contratista, project engineer, materials engineer y an district engineer o provincial engineer o municipal engineer sa Ombudsman.
*****
Panahon na siguro na pagayonon an Memorial Fountain diyan sa tahaw nin Virac.
Kalain nang paghilngon an lugar na dedicado sa mga nakilaban kan panahon nin Giyera Mundial numero dos. Paribot nin alambre, iguang mga nakabitay na solar panel.
Minsan dae na paghiwason an disenyo, salidahan nin materyales na marinas-rinas. Saro pa, ibarik na an fountain ta iyo ini an nagimathan nin mga tawo…