Pinapatanidan na an mga taga-Virac na iguang ataman na gadya pero dai nagakod.
Mag-atas-atas na tabi sa pagbakal nin dog collar asin gakod caini ta dae na maawat dadakupon na an mga ayam na gabaragbarag sa tinampo.
Ini bilang pagsunod sa ley laban sa pagkalat nin helang na rabis.
Maguiromdoman na binuksan na an animal shelter na pinundar kan administrasyon ni alcalde Samuel Laynes diyan sa Community Hub sa San Isidro Village dae pa sana naawat.
Oras na matapos na an training kan mga enforcer nin municipio, matao na nin noticia sa mga capitan nin sisenta y tres na barangay sa iskedyul nin darakupan.
An mga madakop na layas na gadya dadarhon diyan sa shelter y an hayop caipuhan gawadon kan kagsadiri sa laog nin tolong aldaw pakatapos magbayad nin penalidad base sa ordinansa.
Kung dae magawad an ayam, posibleng ipa-adopt an mga ini sa kung sisay man an gusto.
An mga paradakop sa tinampo man sana maconducta kan operasyon, caya libredo an mga nabuang mga gadya sa laog nin oficina de gobyerno, minsan dae gasurubo an kimot ninda, he! he! he!
*****
Pirang aldaw matapos nagpaluwas nin manifesto nin suporta an mga halangkaw na opisyal nin CatSU, ni dae lamang nin anuncio sa social media account kan unibersidad manongod sa resulta kan eleksyon sa University Student Council.
Grabeng riwoy, tinta, load asin papel an ginastos sa isyu kan soboot pakialam kan administrasyon kan presidente sa eleksyon kan mga student leader.
Ngonian na tapos na, dae lamang ni anong reparo kung sisay an mga nanggarana, ano an mga nakuang voto asin iba pa.
Hae na daw an nag-withdraw sa campanya, madagos daw an pagsumitir nin pormal na reclamo?
Adyan man daa cotana si atorni Puting Buhok, ga-ofrecir nin libreng servicio legal sa kung sisay man an gustong magtapok sa administrasyon.
*****
Padagos ang pagtios nin mga trabahador sa local na construction industry.
Labing cabangang bilyon na halaga nin proyecto an hinari sa DPWH Catanduanes y dinara na naman sa regional office sa ibong para duman ipabidding asin implementaron nin mga enginiero ninda.
Segun sa mga nacaisi, an gustong sabihon caini, dae na naman nin trabaho an mga hornal na tawo nin mga contratistang taga-Catanduanes.
An matrabaho kan mga dinulag na proyecto mga taga-ibong na contractor y an tawo ninda siguradong cadaclan mga taga-ibong.
An mga equipaje caini bibitbiton man sa Isla Maogma pati na an mga gamit arog kan semento, plywood, alambre asin bakal. Pati ngani siguro graba y baybay ikua pa sa ibong ta mas barato an presyo duman.
Natural an tax sa mga patrabahong ini duman man ibayad sa BIR sa mainland.
Saro pa sa mga luging sektor iyo an mga enginiero sa DPWH Catanduanes, magpoon sa ordinaryong paragibo nin plano sagcod sa district engineer.
An mga project engineer daing deligencia ta daing proyecto, iyo man an saendang mga amo.
Magayon na sa mga maabot na bulan, pabisitahon an mga doctor kan RHU sa oficina ninda tanganing mareparo kung mga hayblad na o sobra na an niwang bako sana an bolsa, he! he! he!
Mayad pa an tunay na mga amo kan DPWH, an gatocaw asin gatindog na representantes ta dae mawaran, he! he! he!
*****
Mapoon na an tag-init. Mawara na an padiit-diit na uran asin hangin.
Iyo na ini an panahon na dulot kan climate change. Pasensya an mga daeng imo ta hanggan pamaypay asin paghuba sana an maginibo…
dae nang anuncio sa USC election, daeng congratulations sa nanggana?
Padagos na pagtios nin mga contratista y trabahador
Ang mga bus ning CatSU