Caidto, ang hunasan sa tampad

Late ning mga tawong parabuso,

Para banwit para pangilaw;

Agahid, ambit, pangki, sinsoro.

Pagkabuhay ninda piga laom sa hunasan.

 

Nanamitan mo na ang dinanat

Na cuyog, cogita, canuos, turus?

O kaya inun-on na angur,

Dokna, ilid-ilid,urarhut;

Pritus na parad,wakat, pasu;

Cocidong buskay,tuwad-tuwad, sihi;

Adobong ti-um, sahang;

O dinarang na surahan;

O kaya hamburang ik-ik?

 

Manag-um talaga.

Lalo na kun pinusakan nin sili!

 

Ultimong mga awot dian

Mga pambihirang bulong:

Lato, tarindakon, gulaman, lawing

O bunga ning mariw-bariw.

 

Pero ngonyan, wara-wara na-

Ang kasilaan, patarak na.

Su mga buskay, bungkang, haen na?

Ultimong ik-ik dai na ga turawis!

 

Ngata, ano daw ang nangyari?

 

Seguro, napabayaan ning tawo…

Minasaker daa ang hunasan;

Bayhati, tubre, kuryente, bumba, susa,

O kung anu-ano pang mga panghilo.

 

Kaya ang hunasan ta ga tinghak na.

Diit-diit nang naubos ang mga biyaya.

 

Kung dai kitang gigibohon

Pano na ang dagat ta

Sa maabot pang mga panahon?