Hararom na palan an dagat na pigabusohan kan mga contratista diyan sa DPWH Catanduanes.
Segun sa mga huringhuding, uminabot na daa nin treinta porciento ang buso kan mga contractor na desperadong makakua nin proyecto.
Dati daa, hanggan sanang veinte cinco porciento an dayb kan mga ini.
An gusto tabing sabihon caini, mga tugang na daeng pagkasabot sa mga pabidding nin mga proyectong imprastraktura, an total bid price kan contratista bawas nin treinta porciento sa inaapod na ABC (Approved Budget for the Contract) o fondo para sa contrata.
Sa siring daang presyo na bawas nin veinte cinco o treinta porciento, an matada na sana para sa negociante matapos na gastoson an para sa semento, bakal, graba, baybay, porma, krudo, bayad sa trabahador asin iba pang mandiliit-diit na bagay.
Dae nang hahalaton an sisay man na politicong mahagad nin sainya man na parte, na maabot man nin dose hanggan disisiyete porciento.
Posibleng an mga tawong mapirma sa papeles, malahidan pa man kan aceiteng pampahanglas, lalo na an ultimong mapirma, alagad posibleng sinsilyo na sana ini.
Tibaad hanggan na sanang mirindalan na baduya, mani o hot cheese pandesal with malunggay an manamitan kan mga makapot kan papeles na mga personajes sa DPWH.
Kung sabagay, marinas man na nangyayari an bagay n aini, ta pabor sa publico (kabali si Noynoy) na mga parabayad nin buwis.
Saro pang posibilidad: dae na maawat, makahangos na sa irarom nin dagat an mga local na contractor, bagui nang si Astrobal, he! he! he!
*****
Pigapaimbestigaran palan daa kan DPWH regional office an oficina caini sa Isla Maogma dahil sa bakong toltol na patrabaho.
Sabi kan sarong chismoso, inorderan daa an local na oficina na magpariwanag kung ngata mas halaba an saendang nahaman na proyecto kaysa nahaman kan regional office sa parehong cuarta.
An proyecto yata seawall o river control, dae ko na maguiromdoman.
Duwa man sana an gustong sabihon caini, mas toltol an patrabaho kan DPWH sa Isla Maogma o talagang an pagkahaman kan Program of Work sa DPWH regional office mas dakul an nakapunta sa contratista ta mas hababa an proyectong natapos.
Pero tibaad an mensahe kan imbestigasyon kan regional office iyo ini: na an mga taga-islang ingeniero magsunod na sana sa mga taga-region pag-abot sa disenyo, cuentada y patrabaho kan mga proyecto tanganing daeng problema.
Entonces, everybody happy, he! he! he!
Bahala na an mga ciudadano sa Isla Maogma, cabale na si atorni Puting Buhok, magreclamo sa Ombudsman o sa 8888.
*****
Iguang osipon na tibaad daa makasuhan an magcapirang opisyales sa DepEd Division Office sa soboot anomalya sa paseminar.
Dae ta sigurado kung tama o sala an paraosip pero iyo ini an nangyari daa.
Iguang ginibong paseminar, nagsingil an mga opisyal nin bayad na seis cientos pesos sa cada nag-attender, tibaad para sa pagcaon y paggamit kan lugar.
Alagad, sabi kan sehongan, pakakua daa kan resibong binayadan sa kung saen na establisimiento, ginamit ini para pareimbursaran sa division office. Kung nangain an cuartang kinubra, daeng pagcaisi an cadaclan.
Igua yatang nacadangog kan nangyari y inosip sa 8888, an oficina sa gobyernong puedeng osipan kan mga Milagro, y pinadara siguro sa Ombudsman para maimbestigaran.
Mahapot-hapot kita kung ano talaga….