Diyan daa sa Bato, kung saen gataga-sesyon an House of Representatives sa rikod kan Great Wall of Batalay, gusto daang bawion kan mga residents an pinirmahan nindang petisyon para sa People’s Initiative.
Segun sa mga chismoso, ginamit daa an barangay health worker sa pagpapirma kan petisyon, na dae man nin nakakahang kundi an amendaran an probisyon kan satong Konstitusyon tanganing puede nang bag-ohon an iba pang probisyon kaini.
An problema caini, mga tugang, dae man daa nasabotan kan mga nagpirma an saendang pinirmahan, kaya gustong bawion sa Batalay House of Representatives.
Sabi ngani ni atorni Puting Buhok, dae ngani siguro nasabotan kan satong lehislador, an mga ordinaryong tawo pa daw, he! he! he!
Sa sakong pakasabot kan petisyon na dae man nakasurat sa Bicol o Filipino kundi sa English, kung maaprobaran ini, an Senado asin Kongreso mavoto bilang saro para aprobaran an anuman na amendment sa Konstitusyon sa votong three-fourths kan total na miembros.
Entonces, an veinte cuatrong senador pati an labing dos cientos na congresista mavoto bilang saro sa anuman na gusto nindang amyenda sa Konstitusyon, maging probisyon sa ekonomiya man an o sa term limits o mas halawig na pagtocaw kan satong mga honorable sa puesto.
Kung sasaboton mo, lamang an mga congresista sa mga senador, caya kung ano an gusto ni House Speaker Romualdez pati an Malacanang, sigurado nang lusot.
An mga nagpirma sa petisyon sa People’s Initiative, dae nang pakilabot y dae nang poder makialam sa Kongreso.
Sa ngonian, mga isyu sa ekonomiya daa an proponidong amyendahan: tatawan an mga bakong Pinoy na magsadiri nin daga o propiedad, ciento por cientong ownership nin companya sa telecommunications, transportation, energy asin iba pang sector, asin iba pa daang mga paagui tanganing makaroy an mga foreigner na mag-invest sa Mahal kong Pilipinas.
Alagad, segun sa mga matinong an kaisipan, adyan sa rikod kan isip nin satong mga kongresista an pagpahalawig nin termino nin mga local na opisyal, mga miembros kan Senado y Kongreso y an presidente y bise presidente.
Kung tolo sanang taon an permiso ninda magtabag sa banwaan, gigibohon na anom. An presidente man gigibohon nin doseng taon an pagtabag sa nasyon.
Posible pang bag-ohon an form of government, gigibohon na federal siring sa dati nang pigproponir caidto.
Si House Speaker Romualdez daa kaya, igua man nin pangaturogan na maging lider kan nasyon, bako sana kan mga buwaya sa Kongreso. Kaya kung federal an gobyerno, siya an magiging enot na prime minister y an presidente magigi na sanang tawo-tawo sa posporo.
Kaya, inaapodan an gabos na votante, lalo na itong mayoriyang makicuarta, mag-isip man ngona bakong rosnos sanang rosnos.
Igua na daang nagluwas na bagas na panartag sa tres porciento kan mga votante cada barangay. Maghapot-hapot sa mga iguang inadalan. Kung dati nang iguang inadalan, maghorop-horop kan mangyayari kung tutugotan an mga lehislador na gamiton an People’s Initiative para makua an gusto ninda.
*****
Mapoon na sa Enero 28 an United Catanduanes San Diego (UCSD) Gift of Love Medical, Dental, Optical and Humanitarian na pinangengenotan nin sarong aqui nin Isla Maogma, si Dr. Oscar O. Enriquez, sa tabang kan mga gobyerno local y volunteer groups.
Pakatapos na maribot kan grupo an mga piling mission churches sa Diocesis, magcacaigua nin Volunteer Appreciation Dinner sa Febrero 2 sa E-Crown Hotel na sponsor kan familia ni Mrs. Salvacion Olfindo Enriquez na ngonian aduman sa San Diego, California.
Ini sa kaogmahan kan noventa y siete anyos na Viganon na an saiyang aqui na si Dr. Oscar Enriquez, sa pagfundar kan Gift of Love Mission, gapaheling nin ehemplo sa mga asensadong mga Catandunganon sa iba pang parte nin kinaban na daculang ondra an magparibod sa Isla Maogma asin mag-ofrecir nin libreng servicio asin tabang sa mga nangangaipong kahimanwa.
Lugod, pangarogan an pinapaheling na magayon na gawe nin familia Enriquez asin an saendang mga mayor na sponsor tanganing mas dacul pang tawo an makinabang.
Dolyar man an o piso, an yaman na natipon dae man madadara sa lulubngan, sa infierno, purgatorio o kahadean nin Diyos. Mas mayad na ihiras sa kapwa, sa mga tugang sa barangay na nagtitios.
Harimbawa man na maringwan ka kan tinabangan mo oras na dinuhay na an saimong pinakaon, isi na kan Kagurangnan an saimong ginibong karinasan.
Magdanay man lugod an daeng sawang pagdamay kan UCSD sa Islang Catandungan hanggan sa masunod na henerasyon…