Bakong sanang maripot na hangin ang dara nin Enero sa bag-ong taon kundi politica.
Nanartag nin calendaryo na sa manlaen-laen na lugar an presidente kan CatSU, aduman an logo kan universidad an Padagos na Paanos, asin parte kan litrato nin mga estudyante y faculty na pinairitaas an toong kamot, natural dacula an litrato kan presidente.
Bayad siguro ini kan universidad ta gamit ngani an logo. Ini an primerong vez na an sarong presidente kan CatSU nagpagibo nin calendaryo, dinaog an mga nacaaguing presidente na sinda Mining, Asuncion y Adolfo. Kung sabagay, dae man nin ambisyon sa politica an mga ini,
Bago pa kaito, naghambog an nacatocaw na nakadisponer siya nin tres cientos milyones pesos na fondo para sa sports center na itogdoc sa laog kan CatSU. Karahayang boot daa ini ni House Appropriations Committee chair Zaldy Co.
An totoo caini, mga kahimanwa, tinagamahan nin Congreso an cada provincia nin inisyal na sanggatos milyones pesos na fondo para sa pagpatogdoc nin inaapod na MICES (Meetings, Incentives, Conventions, Education and Sports) building na gagamiton nin DepEd asin mga local na gobyerno sa manlaen-laen na actividad.
Ini pinun-an kan 2023 budget y ibugtak cotana ini sa vacanteng lote kan DepEd sa rikod kan CNHS.
Alagad ta malang magkalaban an campo kan gatocaw na congresista asin gatindog na congresista sa sarong lado, asin an mga alcalde asin an capitolyo sa ibong na lado, hinari kan duwang congresista nin Batalay House of Representatives an proyecto y binaryo sa laog kan CatSU.
Kasabay ini kan Catanduanes People’s Center na cotana bagay sa laog kan capitolyo alagad kinahang naman duman sa gilid kan CatSU sa Real St.
An problema na ngonian, magpoon na magpaanos an halangkaw na opisyal kan universidad na puede siyang magcandidato sa 2025, nauyag na man an relasyon caini sa Batalay House of Representatives.
Caya ngani kan nacaaguing semana, an pagtao nin servicio kan PRC sa mga propesyunal sa Isla Maogma dae na ginibo sa CatSU kundi aduman na sa DPWH district office na teritoryo kan congresistang gatocaw asin gatindog. Pan-o na ini ngonian?
*****
Igua palan nin diit na caribocan an pamiting kan bisitang poderoso sa Congreso duman sa Rakdell Inn.
Nag-abot daa s Cong. Zaldy Co para hilingon an CDHI, na soboot nag-ofrecir na ipabakal an mayoriya kan shares of stock tanganing madagdagan an pondo kan ospital.
Siya man daa cotana an mayor na visita sa pagbukas kan bypass road duman sa Baras alagad dae na nadagos ta nagpamiting nin mga lideres nin provincial.
Bago pa man daa ini nag-abot sa hotel ni TGP Cong Bong Teves, aduman na daa sa atubangan nakabantay an presidente nin CatSU, nakahanda na man an saiyang cameraman sa gilid.
Caya daa pag-abot kan vehiculo ni Cong. Co, nakaabang na sa atubangan an pata.
Pag-atubang kan duwa, sige na man an pitik kan litratista.
Nagpurbang magsunod sa visita para makalaog sa venue alagad hinarang kan mga alalay ni Cong Bong.
Dae man palan cabale sa listahan an presidente, ta an mga imbitado sana mga lideres nin capitolyo, miembros nin junta provincial asin mga alcalde.
Naringaw siguro an presidente na bako man na handa sa piyestahan an saiyang pupuntahan, he! he! he!
Sabi ngani sa Biblia, marinas ngayang kung malaog ka sa funcion, duman ka sana magtocaw sa gilid-gilid, tanganing magin daculang ondra saimo kung maheling ka kan kagharong y imbitaran ka sa enotan.
Inda kung napiktyuran ini kan dae pinalaog….