Duman sa banwaan nin Bato kan nacaaguing semana, lima katawo an nairido sa banggaan nin duwang motorsiklo.
An duwa sa irido, mga drayber palan nin habal-habal, y an tolo mga estudyanteng pasahero nindan duwa.
Segun sa pulis, an duwang motorsiko parehong dae rehistrado sa LTO. Entonces, daeng insurance, daeng reresibihon na pambayad sa bolong an mga victima.
Diyan daa sa Bato dacul an habal-habal, lalo na sa ruta papuntang Bote y Carorian.
An problema sana caini, bawal an habal-habal ta bako man sindang rehistradong magsakay nin pasaherong gabayad arog kan Angkas asin iba pang companya sa Metro Manila.
Alagad dae man mapilit an publico (dae cabali si Nestor) na sa tricycle sana magsakay, lalo na kung sisingilon ka nin mahal kung solamenteng pasahero ka sana y mahalat ka pa nin awat kung papanoon an tricycle nin overload na sakay, hanggan sa atop.
Siring sa reclamo nin mga pasaherong gasakay sa ruta nin kataraning na banwaan pa Virac, ano daw kung repasohon na man kan mga consejo municipal an pamasahe sa tricycle sa kanya-kanyang banwa tanganing makatipid man nin diit an mga parasakay?
Kung puede pa, consideraron an pagrehistro nin mga habal-habal basta aprobado nin gobyerno y mga batid an mamaneho.
*****
Ano na daw an nangyari sa reclamo nin parasira sa población nin Virac manongod sa uyag na marine buoy, o saro sa mga gailap-ilap asin galataw-lataw na berde o pulang ilaw sa dagat palaog sa doongan nin Virac?
Segun sa reclamo duwang semana na an nacaagui, dae na daa gailaw an saro caini, bagay na nagtao nin takot sa mga parabanwit asin paralawod lalo na kung banggui.
Tibaad daa magcaoroyag an saendang sakayan oras na mabangga an dae naheling na boya.
Sinabihan na daa caini an Coast Guard alagad an sabi daa bako ninda ining kiber, kundi sa PPA.
Dae daang gasolina an speedboat kan PCG diyan sa Sta. Cruz caya madisponer ngona nin pangarga sa PPA.
Kung harimbawang dae pa ini naresolveran sa ngonian, magayon na mag-arambagan na ngona an mga parasira asin an natipon ibakal nin solar-powered na Christmas light diyan sa tindahan nin Taiwanese.
Iyo na ngona ini an iburobod sa boya minsan made in China pa, total dae man ini makasulo, he! he! he!
*****
Harani na an fecha 25, malugdog na naman an mga maki-Krismas!
Pira daw sa satong mga ginagalangan na honorable sa provincia y mga municipio an matagama lamang nin ipapanaltag sa mga nangaipo?
Igua na daang nanaltag nin ham sa mga residentes nin magcapirang barangay sarong semana pa bago an Kapaspuhan alagad bako man gabos nakaresibe. Sa mga daeng repridyeretor, siguradong dinuhay na an saendang kinaon. Su iguang mga freezer, paabton man siguro sa 25 pero kung iguang mas maklase, siempre eenoton an buro-barato, he! he! he!
Ta nasanay nang rombohan nin mga naki-Krismas, an mga iguang kaya sa Virac asin iba pang banwaan cierto nang mapreparar man maski diit. Puedeng dolsi, sinsilyo, biscuit, lugaw, o tsokolate sa mga aqui, y sopak na bagas, noodles, imo, biscuit o tinapay sa mga gurang.
Ang importante, igua maski diit…
*****
Iguang mga nakaguda sa eleksyon ning mga Liga ng mga Barangay sa onceng municipio.
Duman sa mga banwang isi na ang manggagana y dae man nin naglaban, posibleng pangmaskada o pang-Jollibee sana an naresibe.
Duman daa sa Bato, nag-ofrecir daa an campo kan gatocaw asin gatindog na congresista nin cuarenta mil pati sarong multicab sa cada tawo nindang capitan pati na an sisay man na mabanwit sa campo ni alcalde Johnny.
Alagad, dae yatang kuminagat ta dati nang daog sa numero an mga manok nin Batalay House of Representatives.
Nabawasan pa ngani daa an maldos kan duwang representante ta buminalyo nin kudal ta malang dae man daa tinao an 40k y duman sa ibong na lote may nanaltag nin Treinta, he! he! he!
Inda duman sa Payo, ta gorolpihan man an laban sa pagka-bise presidente….