Marinas mamasyar sa Isla Maogma ngonian na Deciembre lalo na diyan sa capitolyo kung saen adyan an mga belen na minarepresentar kan selebrasyon nin Kapaskuhan sa manlaenlaen na nasyon sa kinaban.
Diyan man sa municipio nin Virac, nagpoon na an Christmas Cheers, mariwanag na an plaza pati an edificio ta nagpoon na an Christmas Cheers.
An ARDCI Mart igua man nin sadiring Christmas Village na puedeng darhan nin mga aki asin pasyaran nin mga mahilig magpost sa Facebook.
Posibleng sa ibang banwaan sa isla, gailap-ilap na man an mga Christmas lights sa mga municipio afuera sa Calolbon, kung saen nareparo nin mga ciudadano na madurom an municipio pati an bag-ong plaza sa may dagat.
Namakal pa siguro sa abroad si alcalde Nonong Mendoza nin mga Christmas lights na bakong made in China, he! he! he!
*****
Maherac man kamo sa mga politico, atang pigaoro-aldaw na nin mga gahagad nin tabang sa bolong, paospital, pangbagas o pamasahe, dagdagan pa nin mga nakihagad nin panghanda o pangregalo sa Christmas party.
An pagselebrar nin Kapaskuhan dae man dapat engrande o gabos makakua nin papremyo, ta dae na ngonian nin tolong hade na mavisita para magdara nin incenso, mira buda bulawan.
Mayad kung duman man kamo sa sabsaban o sa tangkal nin orig matiripon para sa Christmas party.
Kung kulang an cuarta, magpasensya sa sinapna na kalibo, bihon, dinarang na turingan y tubig na tinimplahan nin azucar. Sa inomon, puede na an gin ta diit sanang shot, mainit na an taringa mo. Mahal pa ngani an tuba sa gin ngonian, ta sanggatos na an gallon.
Guiromdomon tabi na naenot na an bayad kan satong mga honorable kan Mayo 2022 pa, caya luway-luway sana sa panghagad, ta matipon naman yan nin panaltag.
*****
Dakul an nakinabang sa Pasalinggaya sa Virac na dara ni Gob Boboy Hamor kan Sorsogon sa amigo niyang si alcalde Samuel Laynes y tukayo Gob Boboy Cua.
Masuwerte an mga magcapirang natawan nin rinibong imo, mga nanggana nin appliances, motorsiklo asin kotse, pero herac man kan mga rinibong inabot nin alas diyes nin banggui nin nganga sa mga palabas. An iba daeng balon na pagkaon habang nakatindog ta habo bayaan an puwesto.
Bako man sana an mga nasa plaza an nakakua nin mejoras. Adyan man an naggibo kan ginatos na latik na balon kan grupo pabarik sa Sorsogon. Adyan an mga waiter asin kusinero sa sarong kaonan na tinigsadan nin sanribo kan mamahaw si Hamor nin rinagang karbaw, ginisa, buda sinalpungan o prinitong libro nin karbaw.
Nakinabang man an mga paratinda nin kaonon sa paribot nin plaza, an mga gasolinahan asin iba pang mga tindahan na nabakalan kan mahigit na treinta mil katawong nakiusyoso kapot an saendang mga numero sa raffle.
Sa otro taon siguradong madagdag an papremyo ta isi na kung sisay an mga candidato, he! he! he!
*****
Napano palan an venue kan anti-coal mining forum na pinaapod kan Lunes na hapon.
Imbitado daa an mga lideres nin provincia alagad nasa Maynilang kayganda an gobernador y an junta provincial iguang sesyon caya an natada an anti-mining coalition pati na an mga estudyante na soboot compulsory an attendance, he! he! he!
Masakit nang makahimo pa an mga pabor sa coal mining, lalo na ta mayoriya kan daga sa Isla Maogma sakop kan Catanduanes Natural Park y an simbahan dae man matugot na mangyari ini.
Posibleng iguang mangyaring illegal na pagmina ta dae ngani napatunong kan autoridad an soboot pagmina nin bulawan sa Dugui.
Cotana, tubodon kan mga local na gobyerno an suhestiyon kan DENR na an mga taga-LGU gibohon nindang mga diputado tanganing makatabang sa limitadong fuerza kan agencia sa pagprotegir kan satong natatadang kayamanan sa bukid.
Noarin daw ini mangyari?