Iguang magcapirang mga magurang nin estudyante sa CatSU an nagpaabot nin reclamo manongod sa pigasingil saang contribusyon sa PTA.
An kapagbootan daa kan mga piniling opisyales asin kan adviser na titser, kanghan nin aircon an cuarto kan mga kaakian caya an contribusyon kan cada magurang dos mil quinientos.
Madugo-dugo an taraohan, he! he! he! Herac man kan mga howa o hababaw an bolsa, dae makabayad sa singil kan PTA.
An hapot ngani kan mga reclamador, ngata ngaya ta kaming mga magurang an dapat na mag-arambagan para sa aircon kan bag-ong edificio sa CatSU?
An pagpatanos kan mga classroom sa mga school building responsabilidad kan manejamiento bako kan mga magurang na gabayad na ngani kan mga pigahagad kan escuelahan, sabi pa ninda.
Mga nonoy, mga nene, pagpasensyahan niyo na ngona an sitwasyon ta an mga ibang opisyales ngani daa sa cada colegio, nasakitan na magpabakal nin bag-ong kagamitan arog kan computer o projector ta dae na daang ponding itatao para sa mga ini.
An magayon siguro, matapos na karigoson nin benditadong tubig an mga bag-ong minibus na binakal kan administrasyon sa halagang P4.5 million cada saro, idestino an mga ini diyan sa kataning kan bag-ong edificio para sa mga hayskul.
Gamiton an cada bus bilang classroom ta aircon baga daa, igua pang kubeta sa laog caya dae na caipuhan pang magluwas an mga gusto magtil-is.
Dae bale nang kulang an kagamitan nindo sa classroom basta iguang bus na magamit bilang alternate classroom, he! he! he!
*****
Nag-motorcade palan papuntang Capitol an mga traysikel na byaheng Calolbon-Virac para iprotesta an provisional authority na itinao kan LTFRB sa Cat Island Express.
Maguiromdoman na sarong bulan na an nacaagui, kan pagselebrar nin Catandungan Festival, nagpoon an byahe kan mga minibus sa manlaenlaen na ruta hali sa Norte papuntang Virac asin tolo man na pabarik-barik sa Bato, Virac asin San Andres.
Dae man nin nagreparo caining mga drayber nin traysikel, ta dae man nin gasakay. Kung igua man, saro, duwa o tolo sana.
Ngonian na nadiskubre nang mas barato palan an pamasahe y komportable an byahe, dakul na daa an mga parasakay, lalo na sa Bato-Virac-San Andres.
Sa consultation meeting kan LTFRB regional director, nagreclamo an mga TODA na mawawaran sinda nin hanapbuhay sa pagdalagan kan mga bus nin Cat Island, na segun saenda galaog sa tinampong bako man na national road.
Caya daa inaksyunan man ini ni RD Defeo asin inorderan an companya na magsumitir nin lista kan saendang loading o pickup points sa enterong ruta para mapaisi sa publico (cabali an mga nabayaan ni Nestor).
An hapot ngonian, kung susunodon kan mga TODA sa Bato y San Andres na magpasiring sa saendang mga consejo municipal para resolveran an tolong isyung pinasabot kan LTFRB: an prohibisyon sa ley na bawal an mga traysikel sa national highway, an horon-horon kan mga municipio na tugotan sindang magbyahe sa tinampong bawal, asin an halangkaw na singil sa pamasahe.duwang isyung.
*****
Iguang ciudadano na nagreparo kan mga tarpaulin na nakakabit sa rikod kan magcapirang traysikel sa Virac, lalo na an byaheng CatSU.
Aduman daa an pandok kan presidente asin an pangaran kan unibersidad asin an actividad na gigibohon, pati na an slogan na Padagos na Patanos.
An hapot niya, kung ini pangimbitar sa publico, na iyo daa an primerong vez na gigibohon ning sarong amo sa CatSU magpoon pa kan ini ipinundar, ngata ngaya ta daeng petsa, oras y lugar an tarpaulin?
Caya inaapodan an mga nanunungdan na imbestigaran an bagay na ini, ta lugi an nagbayad kan mga tarpaulin.
Tibaad nasala an naggibo caini y naringwan an petsa, oras y lugar na ikahang sa karatula.
Cotana, haralion na ngona an mga ini sa traysikel asin ibalik sa nag-imprenta para macoregeran asin patanoson nang padagos, he! he! he!