Nagpoon na an kampanya para sa eleksyon nin mga bag-ong opisyales sa barangay.
Segun sa mga huringhuding, an campo daa ni Gob Boboy nagpoon na sa pagpili kan saendang mga candidato para kapitan kan tes cientos quinceng barangay sa Oktubre 2023.
Iyo man daa ini ngonian an gibo kan mga kaalyado ni Cong. Yoloyo, inda sana kung kabali man sa desisyon an gatindog na congresista, he! he! he!
Ta an magiging daculang parte kan barakalan asin barayadan sa 2025 an mga kapitan, grabe kaimportante na maelegir an saendang mga kanya-kanyang manok.
Isipon ta na an nakataya na halangkaw na posisyon sa masunod na eleksyon sa 2025 iyo man sana an puesto nin congressman, caya grabe an kagamohan ni Yoloyo y pag-iriba.
Sa ngonian, dae pa man nin matumba sa gobernador, afuera na sana kung daogon sa mga kasong inaatubang niya sa Ombudsman y Sandiganbayan.
Harimbawa man na magsawa na siya nin manejo sa mga pasusuhayon sa capitolyo, adyan man an saiyang tugang na si Bise Gob Bos Te na iyo an masalida.
An resulta sa kapitan asin SK eleksyon iyo an mapatunay kung matibay pa an liderato nin mga Cua o caya nabawasan na an parasunod kan gatukaw asin gatindog na congressman.
*****
Gurumoc na talaga an DPWH sa Isla Maogma.
Kan nacaaguing semana, saro daang opisyal diyan sa San Isidro Village an nacaisip na bawasan an trabaho nin sarong contratista.
Ini daang contractor na ini obligasyon na magpatanom nin mil cien na kahoy o tree seedlings bilang katukal kan onceng kahoy na kinaipuhan patumbahon ta naaguihan kan proyecto.
Ngonian, segun sa reglamento kan DPWH, an contractor an mapatanom caini, sa lugar na dapat pilion kan DENR.
An ginibo daa nin sarong madunong na opisyal sa DPWH, sinabihan an mga bag-ong amo sa district na ma-tree planting sinda sa Hicming. Dae man daa nagsayuma si OIC Cagomoc y pag-iriba ta iyo man siguro an primerong actividad kan mga bag-ong amo sa atubangan kan publico.
Caya sarong aldaw, nagsarakay sa saendang mga awto an mga opisyales y empleyado, nagviaje pa-Hicming.
Pagbaba, tinarawan na nin seedlings asin sinabihan kung saen itanom an mga ini.
Alagad, kan maheling daa an pari-as asin maawot na lugar sa gilid na pungko, nagsarayuma na an mga goslab na opisyal asin an empleyado, lalo na ta an cadaclan naka-pantalon.
An resulta, binarayaan daa an mga seedling sa gilid y kung saen.
Kung kinua pa ini kan contratista tanganing maitanom sa tamang lugar, dae ta isi.
Kung sisay man an nakaisip kan tree planting sa Hicming, iyo na siguro an magbakut-ol kan mga ini asin ibayad an anuman na deligenciang tinao kan contractor, pwe!
*****
Bako man sana palan sa DepEd Division Office uso an ralagayan para ma-appoint sa puesto.
Maguiromdoman na kan nacaaguing mga taon, sarong superintendent an nabantog ta cada paribod daa caini sa ibong, pirming iguang pangargang mga muebles, kama, asin iba pang bagay na anas gibo sa narra.
Caya ngani daa kung makaabot ka sa harong caini, puro narra an gamit caini sa harong, katas daa kan mga appointment kan mga titser caidto, he! he! he!
Kung nangyayari pa ini ngonian, an mga aplicante sana an nacaisi, lalo na ito daang mga awat nang nasa ranking, alagad dae man natatawan nin puesto.
Sa DPWH palan, igua man nin arog caini, alagad cuarta an invuelto.
Saro daang opisyal an nagregalo nin duwang bugkos nin imo sa saendang hade sa Legazpi alagad nakalampas na lamang an Bag-Ong Taon, daeng balos na narecibe minsan siya an numero uno sa ranking y iyo an pig-endorse kan district engineer.
Igua man daa cotana ini nin endorsement kan gatocaw na congressman alagad an nacatocaw iyo an manok kan gatindog na congresista, he! he! he!