Gariwoy-riwoy na naman an mga parapabakal nin voto sa osipon ni atorni Puting Buhok na sarong grupo an gaplanong maglansar nin recall petition laban qui Cong Yoloyo.
Dae man kitang maginibo caini, lalo na ta nanaltag daa an campo kan congresista nin manangribo kan nacaaguing eleksyon. Natural, maantisipar na an mga votante sa maabot na pambakal nin sarong sakong bagas, pantaya sa bulang o pang-down sa motor, he! he! he!
Ini kung madagos an soboot plano nin mga propesyunal. Inda kung totoong propesyunal sa trabaho o mga propesyunal na politico, he! he! he!
An cierto sana sa panahon na ini, cuarta an dahelan kan gabos.
Cuarta an nakapanggana qui Yoloyo laban qui Hector y Oliver, cuartang deligencia an dahelan kung ngata hinari an bilyones na fondo asin proyecto sa DPWH Catanduanes papuntang regional office, y cuarta man an invuelto kung madagos an recall election na ini.
Masakit kung saro o magcapira sana an makinabang. Mas magayon kung natapsikan man nin asayte an bakong kusinero. Mas lalong marinas kung nakamanit an cadaclan kan rinuto…
*****
Daog palan an mga tahodan na abogado sa nacaaguing eleksyon kan IBP Catanduanes Chapter.
Sa ciento cincuentang mga rehistradong miembro kan grupo, sisenta y cinco an nagvoto.
Dae daa cabali sa mga nagvoto si ex-Cong Cesar, ta dae na naman daa nagbayad kan saiyang annual dues sa IBP, bakong arog kan saiyang tugang na si Jorge.
Nanggana an grupo kan bag-ong presidente, si atorni Allan Zuniega na aduman sa Maynilang kayganda ga-praktis kan saiyang abogasya.
Treinta y ochong voto an nakua niya, cadaclan caini hari sa mga aki pang abogado, lalo na su inaapod na “Leonen Babies” na mga nakapasar sa pinakapasil na bar exam kan panahon nin pandemya.
Daog si atorni Puting Buhok na iyo an candidato kan mga tahodan, veinte cincong voto sana an nakua.
Dae pa daa gapoon an eleksyon, naheling-heling na kan mga ini na delicado an camogtacan kan saendang entry sa derby, ta dae ninda mga midbid an mga mavotong abogado.
Kung maogma an mga joven pang mga abogado, mas maogma daa an bakong abogado, he! he! he!
Sigurado daang masiram an pangodto ni Cong Yoloyo kan Sabado ta nadaog an saiyang kalaban na mortal.
Tibaad ngani siya pa daa an nagcapital kan laban sa IBP, sa paagui kan saiyang consultant na si atorni Posoy y atorni Tamayo na iyo an dating presidente kan IBP, he! he! he! Idagdag pa an suporta kan icatolong congresista kan Isla Maogma, derota an panlaban kan mga goslab, he! he! he!
*****
Bako man sana palan proyecto y fondo an kapot kan congresista sa mga oficina nin DPWH sa kung saen man na distrito.
Segun sa mga chismoso diyan sa San Isidro, kung ika daa ingeniero gaambisyon makakua nin halangkaw na puesto, caipuhan an sutsot nin congresista.
Kung sa Iska Maogma, bako sanang saro kundi duwang congresista an dapat na lanihan. Enot, an nacatocaw na primerong congresista y an icaduwa an gatindog na icatolong congresista, he! he! he!
Masqui sisay daa na mga section chief sa DPWH, na an mga posisyon anas man sanang designation na inaaprobaran kan regional director, puedeng harion ano man na oras y tucalan kan mga ambisyosong malakas sa gatocaw asin gatindog na congresista.
Caya ngani daa pacatapos sana sipaon an district engineer, sinunod naman kan Bato Alisto an mga amo sa BAC, construction, maintenance y planning section.
An numero unong kwalipikasyon iyo na ika maging marinas na parasunod, tanganing an poder y delogencia mapasaenda y mapasaimo,he! he! he!
Disimulado cotana an hiwas na ibaryo an amo sa Quality Control duman sa region, tanganing malugaran an sarong fiel na parasunod na taga-Bato, alagad nasibol kan reclamo. Ga-toron-toron na daa cotana, he! he! he!
Noarin man daw sisipaon an assistant DE?