Cabanga na daa kan mga maintenance personnel kan DPWH sa Catanduanes District Engineering Office puro na palaog kan icatolong congresista kan Isla Maogma.
Segun sa chismosong ingeniero sa SIV, cincuenta y cinco na naman daang mga tawo an pigrecomendar kan Bato Alisto qui DE Joven para magin bag-ong empleyado kan DPWH sa Maintenance Section, na an trabaho kan mga personahe magmantenir sa tinampo nacional, magpoon sa tahaw hanggan sa gilid.
Entonces otsenta na an napalaog kan alistong politico sa dae gasayumang amo sa DPWH.
Nagamo an ibang taga-laog ta tibaad dae na daa abotan nin Hunyo an fondo para sa maintenance ta dae man daa gahagad nin dagdag na fondo sa central office an DE na taga-ibong.
Saro pa daa, sobrang cabanga man kan mga proyecto sa Catanduanes an hinagad kan primerong congresista na ipa-bidding y ipa-implementar kan DPWH regional office.
An gustong sabihon, nabawasan nin trabaho an DPWH Catanduanes y an mga proyectong ini na nasa DPWH regional office dae ninda puedeng pakialaman minsan ampaw na an pakaguibo.
Caya an publico (bako sana an mga hinubon ni Nestor) dapat magin marigmat an mata y pirming handa an mga selpon tanganing kuahan nin litrato o video an mga salang gibo sa gabos na proyecto, bako sana kan DPWH, kundi an sa mga local na gobyerno.
Daeng ibang mabantay kan mga proyectong ini na hari sa binayadan na buwis nin publico (atang bako sanang kila Nestor) kundi an mga residentes sa barangay.
*****
Mainit na an politica sa itaas.
Sabi man sa huringhuding nin mga contratista, pinakialaman na daa kan enot y icatolong congresista an mga proyecto hinagadan y pinagalan ni TGP Cong. Bong Teves.
Segun daa kan icatolong congresista, an proyecto sana daa ni TGP iyo sana itong nasa Baras y an mga nasa ibang sampulong municipio sa Isla Maogma saenda.
Hayahay si May, lakop na an isla, aanabon na an propiedad nin iba, he! he! he!
Dati na daang naghagad an Bato Alisto nin dos porciento kan project cost bilang parking fee.
Caya kung senador ka o partylist representative na mapadara nin sanggatos milyones na proyecto sa Isla Maogma, dapat magtao ka o an saimong contratista nin dos milyones na parking fee tanganing maipadagos an saimong contrata.
Iyo man daa ini an ginibo caidto ni dating Cong. Hector kung caya naghikay an mga nagparada nin proyecto, duman na sana sa regional office pinabidding an proyecto y an mga maabot pang iba, dinara na sana sa ibang provincia.
Gusto man magin alisto arog qui ex-Cong Hec?
*****
Marinas an kaisipan ni alcalde Jun Camano nin San Miguel para sa mga mapakasal sa municipio.
Sa inisyatibo daa kan alcalde, nagpasar an consejo nin ordinansa na an gabos na mapakasal sa civil, caipuhan na magtanom nin tig-sampulong kahoy sa saendang barangay.
Ipresentar an litrato kan tinanom y sertipikasyon kan kapitan na talagang itinanom ninda an mga seedlings bago sinda tatawan nin permiso kan municipio.
An dapat sana sigurong maasegurar kan municipio iyo na an mga tatanuman iyo itong mga pangpang kan salog asin sapa pati na an mga bulod na kulang an kahoy.
Kung an municipio an matao kan itatanom, daeng sinabi an chismosong taga-San Miguel.
*****
Sagcod sa ngonian, dae pa narendahan an presyo nin sila sa saod, lalo na sa panahon na arog caini.
Cuatro cientos an kilo nin malasugui y lapu-lapu, tres cientos hanggan tres cientos cincuenta an sandig, cataway, balanak asin iba pang maclaseng sila, dos cientos an turay, dos cientos sisenta an malughaw, an gabos na ini nakapadulag nin parabakal, na mapasensya na sana sa nakahayblad na carneng orig ta puedeng pidasohon y lutoon nin padiit-diit.
An masakit pa, bako man an parabanwit an nakinabang dindi, kundi an mga parasimber sa lawod asin sa pangpang. Ano daw an marinas na gibohon?