Pangduwa o pangtolong vez na nag-abot sa Isla Maogma an grupo nin mga Badjao para mangilimos kung Deciembre.
Pirming pigahatod nin jeepney o van, senyal na an gakapot kan grupong ini sindikato. Sabi ngani ni DSWD Sec. Erwin Tulfo, an mga grupo daang ini gakita nin dae mababa sa cinco mil an aldaw, lalo na sa Metro Manila.
Kan ultimong visita kaini sa Virac, nangarkila pa ngani ini nin harong diyan sa Rawis.
Sabi nin sarong pulis, nag-abot daa an mga Badjao kan Dec. 1 sakay nin sarong vehiculo. An sarong grupo aduman daa sa iguang pier gailok mantang an saro man na grupo adyan gahigda sa may stage kan Plaza Rizal, gamit an karton na higdaan.
Segun sa ibang negociante, an reclamo ninda sa mga ini ta nangilimos na ngani, nanakot pa daa.
Kinumpirmar man nin sarong pulis na igua na sindang naresibing mga reclamo na an iba daang mga Badjao, lalo na itong mga aqui, gasimit na nin mga saraday na paninda lalo na sa saod.
Sa ibang provincia, pigasakay daa ini sa bus na kagsadiri nin gobyerno y pigabalik sa Maynilang kayganda.
Dae ta isi kung ano an gigibohon caini kan mga autoridad sa Isla Maogma, lalo na kan PSWDO o MSWDO.
*****
Dae na palan nin garantiya ngonian an premyo sa bulang.
Segun sa mga gapaescuelahan sa graduate school ni Poroy, naporbaran daa ini kan nacaaguing 4-cock derby na iguang guaranteed prize na P1 million.
An guminana daa nacarecibe sana nin dos cientos cincuenta mil pesos, kulang nin siete cientos mil. Habo na daa magtao an mga organizer ta lugi an pa-derby.
An hapot ngonian, ta malang an bulang inaapod na gentleman’s pastime na an gamayor iyo an palabra de honor, ano daw an gigibohon kan consejo municipal nin Virac na iyo an gatao nin permiso sa burulang?
An cada permit na pigatao nin gobyerno iguang mga condiciones na dapat sunodon kan tinawan nin permit.
Kung sa saendang pag-apply nin permit, nakakahang an guaranteed prize na un milyon, obligado sindang itao an premyo siring sa mga nagpapa-raffle.
Halaton ta an aksyon kan consejo na an magcapirang miembro mahilig man sa paiwal nin maldos.
*****
Igua na palan nin sinehan sa Virac, puede na naman makaheling nin sineng sa Maynilang kayganda mo sana enot ma maheheling.
Magayon daa an sinehan sa Shopbox, airconditioned, iguang alpombra an salog y daeng sublat an tocawan, bakong arog caidto sa lumang sinehan ni Dadoy, he! he! he!
Puede ka pang magsakay sa elevator, kung dae mo na kaya magtukad sa escalera.
Sa mga buhay na kan panahon nin bag-ong sinehan, nasa icaduwang escalon ito caya caipuhan magsakat. Magayon cotana na iguang orchestra, balcony asin loge, kung saen an mga mahilig sa dolom puedeng magpatago lalo na kung mga magkatrato.
Sa sinehan ngonian, saday man sana, nigo sana an sitenta y dos katawo, dae nang patagoan, he! he! he!
*****
Nabitin an mga parasimba sa misa de Aguinaldo.
An mga lamawon tolo na sana daang parte nin Gozos an saendang nadangog ta alas tres y media pa sana, piga kanta na minsan dae pa gapoon an misa.
Kan nacaaguing taon, an Gozos pigakanta sa laog kan misa, caya masqui maatraso na nin diit, madangog mo na an enterong Gozos.
Segun sa mga osipon, ginibo daa ini tanganing an misa dae maghalawig.
Alagad kung isipon mo, caidto alas cuarto an poon nin misa, matapos alas sais.
Ngonian, sa bag-ong sistema na enot kakantahon an Gozos masqui dae pa an padi, minsan nagpoon alas tres y media, natapos man an misa alas cinco y media.
Naghababa an misa ta saro y cabangang oras sana, alagad an saimong estada sa simbahan duwang oras man siyempre.
An gustong sabihon, an padi an napagal, he! he! he!
Kung hahapoton mo an mga gaatender nin misa de Aguinaldo, nakulangan sinda sa Gozos ta tolo na sanang stanza an naabotan ninda.
Sabi man nin filosofo, ginibo daa ini nin diocesis tanganing an mga gapasimbahan nin alas dos pa sana, mapukawan kan mga sintunadong parakanta, he! he! he!
*****
Apat na aldaw bago an Kapaskuhan, dae pa nabilang sa duwang kamot an nagduhor nin regalo.
Iguang nagtao nin panaod, hamon de bola (su dacula, bakong mananggatoson), alak asin bado.
An pigahalat ko, base sa presyo nin baracalon ngonian na panahon, sarong container na diesel, sarong kilong sili, duwang kilong sebolyas, duwang kilong malasugui, panghalo sa salad y saday na lechon (su qui Kupido), he! he! he!
Sa fecha 25, sisay daw na politico an manartag nin pamasko sa mga mapilang taga-baryo?
An mga Cua, pirmi na. Ano man daw an iduhor kan kongresman nin Batalay y an mga bocal, kung sinda daeng planong magdulag sa Maynilag kayganda?