Igua sigurong kalag an mga ATM nin LandBank.
Saro na naman na empleyado nin gobyerno an nawaran daa nin sisenta mil pesos na pambayad cotana sa motorsiklong uutangon.
Segun sa osipon, primerong semana nin bulan na ini nagduman sa bangko an pobreng empleyado tanganing withdraw na an natipon na imo para ngani sa motor, alagad paghiling niya kan balanse, dae na daang laog an account.
Dae man daa siya nag-withdraw kan mga nakaaguing aldaw para ngani tiponon an cuarta.
Dagos man na pigpaisi an manejamiento kan LBP sa nangyari y an problema daa aduman na sa central office sa Maynilang kayganda.
Kung noarin mabawi an imo, sinda na an nacaisi.
Iyo man ini an masakit sa pagkahang nin saimong pinagalan na cuarta sa bangko, tibaad habonon nin mga hacker o caya ipawithdraw saimo kan mga budol-budol gang.
Mayad pa daang itago na sana sa caban o aparador ta oro-aldaw puede mong mahiling kung pila na sana. An problema man, tibaad masil-ipan ka kang kairiba mo sa harong, mabawasan an sa kakukupit, he! he! he!
*****
Delicado palan daa an camogtacan diyan sa DepEd division office.
Sabi kan mga reclamador na parientes, seseraduhan daa an gate sa gilid kan DepEd na ginagamit daa kan mga estudyante na galaod sa Virac Pilot Elementary School.
An sabi daa kan principal, security reason an dahelan kung ngata kakandaduhan an gate na ini minsan ginatos na estudyante an minaagui palaog sa DPSSMC pakahatoda kan saendang mga magurang.
Segun daa sa osipon ni Madam, igua daang neresibing bomb threat si Superintendent Collano.
Dae man sinabi kan principal kung an bagay na ini naipaabot na sa Campo Camacho o diyan sa cuerpo de policia tanganing maimbestigaran diretso y masusod kung sisay an gapatakot.
Sala man na pasakitan an mga estudyante na duman makisusuan sa main gate dahelan sana na iguang bomb threat si SDS.
Dae man makaabot sa oficina ni Dr. Collano an mga aqui pati na an gahatod na magurang. Igua man nin sikyu na maheling kan mga gamit na pigalaog sa SDO kan saenda man sanang mga empleyado.
Ngonian, kung ano an dahelan kan bomb threat, sa promotion, appointment o barangaan nin kung ano, dae ta pa naisihan.
*****
Disganado daa an sarong representante kan Catanduanes Association USA (CAUSA) na nagbakasyon sa Isla Maogma dae pa sana naawat.
Segun sa osipon, nagulat daa an turistang balikbayan kan an saiyang grupo singilon kan manejamiento nin mga resort, kabali na an mga barangay, kan sinda magpa-picture sa tourist spot.
An mga resort o tourist spots daang ini na gapadulag nin turista nasa luwas kan Virac, ta cierto daa si alcalde Samuel na dae kaan maguibo an mga resort owners o operators sa banwaan.
Magayon na kahoronon man kan Provincial Tourism Office an mga resort owners y tourist spot managers, kabali na an barangay, sa bagay na ini.
*****
Iguang nag-abiso na sa pagbukas daa kan congressional district office diyan sa tampad kan DAR, kuahan nin litrato an mga personajes caini.
Gagamiton daa an mga litrato para masigurong toltol y daeng dukit an mga matukaw diyan sa congressional office.
Igua kaya nin osipon na an ikahang daang mga personajes diyan mga casual employee nin DPWH na pinalaog kan congressman numero dos.
An problema dindi iyo na an mga casual na empleyadong nini pigasueldohan kan maintenance section na maglinig nin kalye, bako na mag-asikaso kan mga visita ni Yoloyo, magpapirma nin papel o listahon an gabos na magayon na babayeng mapunta sa congresista.
An saro pa, an cada congresista iguang fondong tres cientos mil pesos cada bulan para sa arquila nin oficin, pangsuweldo sa mga empleyado y pambakal nin office supplies.
Kung dae ini gagamiton, siguradong syut ini sa bulsa, he! he! he!