Gaselebrar palan an EBMC kan saendang ika-cincuentang anibersaryo ngonian na bulan.
Minsan nadadamay an mga personajes caini sa daindatang ugali kan magcapirang mga empleyado, cadaclan kan mga permanenting opisyal y empleyado mga toltol asin mahigos.
Diit man sana an mga reclamador, lalo na kung naatraso an pasuweldo. Natural man an, lalo na kung iyo man sana an pigaasahan kan familia sa saendang pagbuhay.
Alagad, segun sa mga nakalaog na mga pasyente, bagui daang bako nang mga mahigos an mga utility worker ta an mga kasilyasan dae na nalimpiyahan arog caidto.
Sabi pa, kung saarin daa nagdakul an mga job order na pinadara nin capitolyo, ngonian pa naging maati an mga kubeta.
Magayon na mareparo an bagay na ini ta tibaad puro na mga amo an mga paralimpya y mahalat na sanang iguang magreclamo.
*****
Sige an burosohan diyan sa DPWH y magcapira na daang mga contratista an nalunod, he! he! he!
Kan nacaaguing semana, duwa naman daang proyecto an dae ginana kan tawong binasbasan nin tolong congresista.
Sabi kan mga mahilig sa deligencia, iyo ini an mangyayari kung dae magcaoroyon an mga tawo sa itaas sa pagbaranga kan mga proyectong kinukuahan nin pambubod cada eleksyon.
Caya an patanid sa mga soboot nasabwagan sa Batalay, dae ngona magduhor nin advance ta tibaad mag-iriyak man sana pakatapos kan bidding.
Kung tuso an saendong mga kahuron, dapat mas tuso pa kamo tanganing dae kamo madarhan.
*****
Iyo na ini.
Magpoon ngonian, dae nang masul-ot nin face mask sa luwas nin harong.
An matada na sanang mga lugar na pagamiton ka pa nin maskara, iyo an ospital asin mga oficina nin gobyerno, sinehan, classroom sa escuelahan, lantsa, eroplano, jeep, van, bus y tricycle, magcapirang mga pribadong establisimiento, simbahan, grocery, mall y botica.
An hagad sana kan Malacanang, padagos na maggamit nin face mask an mga goslab, mga dae pa nabakunahan nin duwang saksak, asin an mga dati nang iguang helang, ta tibaad tamaan pa sinda atang magastos an mag-check-in sa ospital.
Alagad, kung gaapura na kamo makaiba sa harong an mga anghel o caya mga demonyo, dae man sigurong mapugol, he! he! he!
*****
Maanangaang pa panahon na dae pa nawara an habagat minsan Septiembre na.
Oras na magbirik na an hangin, mahayahay na nin diit an satong panahon. Maabot na man an satong mga visitang bagyo na maabot pa daang pito hanggang katorse sa masunod na anom na bulan.
Bago pa man mangyari ini, marinas na reparohon na kan mga barangay an saendang mga kanal, paguiromdomon an mga nasasakupan na linigan an mga sagurong, agihan nin tubig y bilangon an mga typhoon guard kung kumpleto pa.
Atang plus na buta an satong PAGASA ta dae pa nasalidahan an tinarbong radar diyan sa Buenavista….
*****
Sa pagpoon kan mga face-to-face classes sa elementarya, hayskul y colegio, nahiling na kung ano an namatidan kan mga kaakian kan panahon nin mga modyul.
Ngonian pa sana, sabi kan mga propesor sa CatSU, dacul na mga first-year na estudyante an soboot mabagsak, lalo na sa mga subject na numero an pigacuenta.
Bagui daang daeng namatidan sa pamuro-modyul kan sinda nasa senior high ta tibaad sige sana an koropyahan.
Ini man an mangyayari sa mga bag-ong laog sa junior o senior high, lalo na kung kan panahon nin pandemya bako man sinda an nagsimbag kan mga modyul kundi an saendang mga magurang.
Masakit na sitwasyon ini lalo na kung an estudyante nasa honor roll kan sarong taon sa tabang kan magurang.
Caya magayon na tabangan otro an saendang mga aqui na masabotan y manud-an an leksyon. Ta kun dae, bugok an makuang grado kan mga aqui…