Dakul palan daa an nagkagurutom sa pa-raffle, ay sala, Annual General Membership Assembly palan, kan Dificelco kang Sabado duman sa Virac.
Segun sa mga reclamador, dae daa sinda nakakua nin pagkaon minsan igua sindang tiket.
Naripasan sinda nin gutom ta habo man magpararibod para maghabhab o caya manghanap nin haraning makakaonan.
An rason kung ngata habo maghari sa tocawan o kinatindogan: gapoon na an paripa kan mga premyo, tibaad maapod an pangaran, sayang an bibitbiton paribod.
Sobra daa panong siete mil tres cientos an nag-abot para mag-atender sa Annual General Membership Raffle, ay sala, Assembly palan.
An tagama man sana daang styro nin pagkaon kan mga kinontratang caterer kan Dificelco para sana sa cinco mil na tawo, caya kulang nin labing dos mil.
Kung nakapaorder nin dagdag na patos, daeng osipon an manejamiento.
Masuerte an mga nanggana ta minsan iguang nagutom duman, nahari an gutom pagbitbit kan premyo, he! he! he!
An pinakalugi iyo itong dae na ngani natawan nin pangodtohan, nagparibod pang talunan.
Sa masunod na pa-raffle, ay sala, AGMA palan, itao na sana sa mga honorableng director an pagpakontrata kan pagkaon y sinda na man an magtaltag sa saendang mga nasasakupan sa cada distrito.
Tutal sinda man an mahagad nin suporta kung makandidato naman sa masunod na termino, puede pa sinda makadeligencia nin pandagdag sa pambakal nin voto, he! he! he!
Kung dae nabasog an saendang mga consumidores o caya nag-orobra ta bakong masiram, bahala na an director sa maabot na eleksyon, he! he! he!
*****
Igua na palan nin bag-ong reglamento an DepEd sa mga pagsuspende nin clase sa mga escuelahan kung iguang mga calamidad.
Segun sa DepEd Order No. 37, gabos na clase sa enterong lebel pati na an trabaho sa mga ini automatikong suspendido oras na mag-itaas an Pagasa nin storm signal number 1 o pataas, magdeclarar nin yellow, orange o red rainfall warning o magdeclarar nin flood warning.
Pararibod man an gabos kung nagkaigua nin rinog na lampas magnitude 5.0 base sa paluwas kan Phivolcs.
Minsan daa nailuwas an signal o warning habang gaclase, dapat paparibodon diretso an mga kaakian.
An publico (lalo na itong mga macuapo ni Nestor na nasa elementarya o hayskul) dae man mareclamo caini, afuera sana sa mga goslab nang mga magurang na naguiromdoman pa an buhay kan panahon ninda.
Sabi kan mga gurang na ini, iguang panahon na iguang senyal numero uno sa bagyo, alagad dae man nin uran. Minsan ngani numero dos na an nakataas duman sa pier caidto, dae pang namateng maraot an banwaan.
Sayang man daa an oras na cotana magamit pa sa pag-adal kan mga aqui.
Posible pa daang suspendihon sa sarong lugar lalo na kung iguang yellow rainfall warning o flood warning, lalo na ta localized man sana an warning na ini.
Kung sa rinog, dae kitang maginibo. Oras na magsayaw na an saendang classroom y magdaralagan na paluwas, pararibodan na talaga an.
*****
Pinagseselebrar ngonian an Civil Service Month.
Bako man ini sanang para sa mga servicio civil kundi para sa mga tawong saendang pigaserbihan.
Panahon ini para maguiromdoman kan mga nasa gobyerno na an saendang amo iyo an publico (dae na cabali si Nestor ta dae man daang servicio civil sa langit).
Iyo man daa ini an paguiromdom sa publico kan kahalagahan kan saendang mga tugang na nasa gobyerno.
Cotana maguiromdoman man kan mga daen datang mga servidor nin banwaan, lalo na an mga politico lalo na an mga consejal, alcalde, bise alcalde, bocal, bise gobernadora, gobernador y congressman na an saendang pigakupit sa kaban nin gobyerno cotana para sa magcacanigong servicio para sa tawo.
Kung sabagay, sabi ngani ni alcalde Ribong kan Virac kan siya nacatocaw pa, bayad man na camo, caya dae na magpareclamo….